女朋友好想睇怪石，但又唔肯攀山涉水，更加唔想熬船搶灘，做男朋友嘅點算好呢？小問題啫，等我介紹一個好容易去，但就有唔少古靈精怪石頭嘅地方畀大家，呢度係位於馬鞍山西南面嘅鹿巢山，山頂竟有大船「擱淺」，不遠處，又出現一隻張口巨鱷，是南生圍那隻躲到這裏來了？別緊張，這全都是石頭，不過就肯定可以同女朋友開心足半天！
記者︰鍾可強 攝影︰林栢鈞
Models︰Lok、Kanami（RichStrategy）
找山路登山十五分鐘便可到達鹿巢山山頂，呢度有唔少受風雨侵蝕嘅石頭，不少都奇形怪狀，有名字的、沒名字的一大堆，大家把這裏稱作「鹿巢石林」。全個「石林」最搶又最神似嘅怪石，首推被稱為「挪亞方舟」嘅石船！活像一艘石雕獨木舟，任何人看到，都忍不住要坐上去撐它一撐。
起點係馬鞍山耀安邨，絕對平易近人。「吓！阿姐，你唔係呀？去行山呀，波鞋都唔着？」約好女朋友上山睇奇石嘅阿樂，一見到女朋友Kanami嘅尖頭鞋，即時嚇親。「你又話唔使點行嘅！」Kanami把握機會撒嬌。又錯唔晒，只要在耀安邨乘村車或的士，甚至是步行往馬鞍山村起步，到達目的地只需約四十五分鐘，雖說是上山路，但大部份都斜度不大。
馬鞍山村，即馬鞍山郊野公園後面那條舊村，村後有小徑登山，走約半小時，便到達與麥理浩徑連接的十字路口，向右轉就係上鹿巢山的山徑。見到這個分叉路牌就要停步，上鹿巢山的路沒有明確指示，不過這山不算高，你一下子就會看到右面的一個矮山頭，有不少古怪巨石，那就是鹿巢山。
「喂，撐去邊？」Kanami鬧着玩，「梗係去搵鱷魚啦！」阿樂一樣咁投入。撐去近日鱷魚出沒的南生圍？唔使，巨鱷就在附近。阿樂把Kanami拉到一堆叠在一起的巨石中，把她送入鱷魚口！咁殘忍？梗唔係，走遠點看吧，除了石舟之外，鱷魚石也入形入格，似足一隻鱷魚張大巨口咬人嘅神態。
喺鱷魚口出出入入，係咪好勇？開心完，呢嚿石原來重可以玩浪漫，換個角度，今次爬上鱷魚頭，坐喺度看風景，居高臨下，山風吹埋身特別清爽。石下看上去，十足一對神仙眷侶，搵人影張沙龍送畀女朋友，肯定冧死。
「你就嚟生日，預先送個生日蛋糕畀你吖！」阿樂繼續浪漫，原來呢度重有嚿「生日蛋糕」石。只見一塊巨石上布滿交錯的坑紋，十足生日蛋糕上的忌廉，看得Kanami目瞪口呆。阿樂撇下Kanami，攀上這嶙峋怪石，站在中央，以人作蠟燭，唱起生日歌，Kanami感動得幾乎要以身相許。
「這邊還有隻動物蹲着呢！」Kanami又有發現。「像甚麼？」「青蛙。」「犀牛。」「大象。」兩個人你一言我一語。查實呢嚿石有人認為似青蛙，有人認為似大象，沒關係，像甚麼？就由你的想像力去決定吧！
如果玩完鹿巢石林仍覺意猶未盡，下山返回剛才的十字路口，再按路牌指示朝昂平方向前行，這段路平坦開闊，不遠處散落着幾個小山丘，乍看竟有幾分像火山。
沿着大路前行十分鐘左右，便會看到一個觀景台，這裏可俯覽西貢全景。假若有倦意，可以從原路返回馬鞍山村乘搭村巴離開。請注意，村巴尾班車六點開出，錯過了就要Call的士上嚟接你啦！
交通從耀安邨巴士總店乘84R村巴往返馬鞍山村，車費每程$5
