外資繼續流入，金管局兩日內共接入2億美元沽盤，遏止港元升勢，但港股繼續偏軟，未有受惠於資金湧入的消息。
昨日恒指12000關口曾失守，但最後險守12000之上收市，報12003，跌153點，成交只有119億元。成交動力不足兼恒指跌破20日平均線，港股短期應會轉弱。
儀征（1033）晨早停牌，雖然公司講明等待公布關連交易，不過市場仍然傳出儀征配股抽水，拖累H股遭到拋售。儀征股價對資產仍有折讓，照計唔會批股。
中石化（386）同海油服務（2883）各跌逾3%；傳聞要集資130億元人民幣嘅首都機場（694）更下挫7%；早前收購6省市電訊網絡業務嘅中電信（728）亦傳會伺機配股抽水，加埋市場傳出國內會延至05年才發出3G牌，搞到股價被質低5.1%至2.325元；至於將向母公司收購10省市網絡業務嘅中國聯通（762）亦跌3.5%。
市場似乎對抽水活動嘅憂慮更甚至於美國加息，若屬實，面對中國人壽上市威脅嘅人保財險（2328），股價可能有壓力。駿威（203）其實亦有抽水可能，一旦外資高位減持，殺傷力相信會頗為驚人，但駿威噚日逆市上升3.9%至6.65元。
ASM太平洋（522）前日創逾3年股價新高後，品質（243）噚日亦炒高7.3%至3.30元，股價走勢似乎係追落後。市場有消息話，品質要見4元目標價至考慮配股。
阿虎