港股跟外圍跌勢轉急，恒指曾低見11946，下挫逾200點，收市雖跌153點，險守在萬二關之上，但已跌穿20日線（12116），短期若能重返其上，還有再升希望，否則就要到50日線（11613）和上月24日的低位11558水平，才會有強力支持。今次調整，係徇眾要求，由於等買平貨的人太多，大市調整幅度唔會太大。
大市雖跌，但上升股（不計認股證）仍有近200隻，且唔少都係二三線中的熱門股，預期大市在調整期間會趨向個別發展。近期推介的股票中，有多隻逆市而升，包括慶鈴（1122）、權智（601）、冠軍（092）和華電國際（1071），4隻股票走勢都現突破，有貨在手者，仍可持有。
冠軍持有57%的看通集團（1059），今個月由0.15元急升到0.241元，升幅達60%，而期間冠軍仍企於1.8元，未有升過，以冠軍盈利能力一樣咁強，令次大有條件追落後。現年度（6月年結），冠軍盈利保守估計可上升到2.3億元，每股盈利33仙，就算以6至7倍PE計，冠軍已可見2字頭。
基金繼續買住隻人保（2328），早一日芬佬已話過，若股價回到2.45元至2.5元水平，則不妨小注吸納揸長線，股價有機會再創新高。噚日，人保最低見2.475元，果然就掉頭回升，平收2.55元，成交再縮到1.48億股，若升破2.575元，成交又回升，則調整確認完成，上升目標指向3字頭。
首長寶佳（103）有消息，話短期內會有大動作，上禮拜五，寶佳股價急升1成後，過去兩日升勢仍好有力，而且噚日重見到有大行大手吸納，聽講佢哋嘅目標價係1.5元。
寶佳最近增持嘉興東方成全資附屬，今後將主力生產汽車子午線輪胎鋼簾線，嘉興去年盈利已大升1.3倍，今年內地汽車銷量激增，鋼簾線供不應求，公司已斥資3億元，將嘉興產能由每年的1.4萬噸增至3萬噸，預計今年單係嘉興的盈利已達1億元，明年更可上升到1.5億元，以10倍PE計，嘉興已值15億元，超出寶佳市值的11.6億元。基金同大行買得咁急，必然有因。
郭兆誠