足智彩愈開愈多花款，本地電視台亦唔執輸，不斷增加直播比賽；噚日亞視同擁有西甲播映權嘅收費台達成協議，宣布可以喺今季獲得十場西甲直播賽事同每周嘅精華節目，咁樣啱啱先攞咗荷甲聯直播嘅三色台咪……。
據講今屆已攞咗歐冠盃嘅亞視有自由選擇呢十場西甲嘅戲碼，冇裝收費台嘅觀眾，應該有機會睇到皇馬對巴塞隆拿、拉科、皇蘇同華倫呢類大戰，實為球迷一大喜訊；話時話，睇番三色台暫時到𠵱家，淨係有荷甲直播睇，如果咁啱撞正亞視播西甲，球迷會睇邊個台呢？
另一單料就係now寬頻已攞咗歐洲國家盃附加賽最矚目嘅荷蘭對蘇格蘭兩回合播映權，即係話收費台只能播其餘四場比賽，你話𠵱家嘅電視台足球直播大戰搶得幾激烈呢！
早排同荷蘭教練艾禾卡特不和而被棄用嘅雲尼斯達羅，終於重返國家隊備戰對蘇格蘭嘅歐洲國家盃附加賽，但我求大俠奉勸佢咪開心住。入選唔等於有落場機會，況且尹達華特放風話自己拍硬古華特攻堅，所以艾禾卡特選番雲尼斯達羅係留個後着畀自己，費事出局俾人捉痛腳。
幫意大利攞咗八二年世界盃嘅達杜尼，踢波醒就係人都知，但係轉做球會教練就認真唔掂。佢喺意大利青年軍教波嘅成績尚算唔錯，不過轉教球會後，就教唔耐衰唔耐；前幾年佢先俾國米炒魷魚，之後就轉去意乙聯教波，一樣撈唔掂，前日重俾巴里開除。踢波叻唔係代表教波叻。
前英格蘭國腳中場韋斯，喺星期一正式俾英格蘭甲組嘅米禾爾，委任為領隊兼球員。韋斯重帶挈埋佢好友韋健士成為球隊嘅副領隊㖭！韋斯自從喺十月中做球隊嘅臨時領隊之後，表現真係唔錯㗎，加上米禾爾又冇乜錢搵其他有名氣嘅領隊，咪一於順水推舟，委任佢為正式領隊囉！
好多莊家同波友今季都睇好有「四大天王」撐住嘅「超級名牌」湖人捧盃，所以喺季初唔少波友都驚死執輸，爭住追捧呢隊波，點知湖人好睇唔好食，開季至今打七場波雖贏咗五場，但盤路係一勝一和五負，作客更加有輸冇贏，累死啲捧場客！勸大家唔好盲目捧呢隊波，尤其係作客！