已婚電視小生形象一向顧家，對老婆仔女又好好，所以外間一直覺得佢唔會拈花惹草，點知近年嚟佢周不時傳出緋聞，出面啲人都話跌晒眼鏡，諗都諗唔到呢位已婚小生原來都幾花心。
其實咁多年嚟佢都冇間斷過出外搵女人，有時佢重會去夜總會搵小姐，不過佢係好小心嘅，佢好少入去逗留好長嘅時間，多數係先打電話畀相熟嘅小姐，然後約定喺附近停車場畀個小姐上車。
因為佢次次都係喺停車場接啲小姐，一接咗個女仔就即刻開車走人，所以狗仔隊要跟佢都唔係咁易，就算跟到，都唔知啲女仔係喺夜總會出嚟，電視小生條橋雖然舊，但佢老婆懵懵哋，根本唔知個老公咁爛滾！
郭富城噚日出席喺中環舉行的「GeraldGenta」酒會，大會為表揚城城事業成就，同對社會嘅貢獻，頒咗個獎畀佢。城城話一直以嚟都收過唔少手表，諗住將來將啲表拍賣捐做慈善，而自己最珍貴嘅收藏係一架F50嘅法拉利，佢話到咗一日變得無慾無求嗰陣，就捐埋出去，幫吓有需要嘅人。
林嘉欣最近出新碟，因忙於四出宣傳，終於不支病倒，噚日佢去港台接受訪問，又係咁攞住張紙巾，不停抹鼻，佢話：「可能係天氣轉涼，有少少傷風，不過聽日又要去台灣做唱片宣傳，真係好鬼攰。」問佢有冇去睇醫生，嘉欣就話：「再睇吓點先啦！再嚴重啲就會抽時間去睇。」唉！究竟佢知唔知道傷風會傳染人㗎？
鄧肇欣噚日去新城接受訪問，佢今日二十三歲生日，問佢有乜嘢生日願望？鄧肇欣話希望可以拍多啲戲同出唱片，問佢契爺劉德華有冇表示？佢話唔知，但就年年都有送禮物畀佢。鄧肇欣今日唔使開工，不過佢話因為屋企人全部唔喺香港，所以可能自己行吓街，或者去愛護動物協會同啲狗仔、貓仔玩吓就算。
黃霑、胡楓噚日為茶餐廳剪綵。黃霑話下個月會同亞視合作炮製節目，專門介紹安全套，不知贊助商有冇贊助黃霑一世任用避孕套，佢話：「重使用，我自己搞掂唔使用啦！講起呢樣嘢，我有聽張燊悅個電台節目，佢唔識中文成日話自瀆，係唔啱！係自慰，自瀆係有犯罪嘅感覺。」
陳欣健嘅母親上周五喺醫院病逝，享年八十歲，陳母係虔誠天主教徒，一生熱心公益，經常為慈善團體做義工，幫助有需要嘅人。
𠵱家喺東方電影任職嘅陳欣健，噚日喺電話講：「𠵱家我忙緊搞喪事，由於媽咪係教徒，經常做義工，得到唔少教友尊重，所以教友都主動話要幫手。已經定咗下個禮拜日（十六日）為媽咪設靈，禮拜一出殯，整個喪禮會以天主教儀式進行。」馮仁昭惟有同陳欣健講句節哀順變。
