「維港巨星匯」卒之玩完，由滾石樂隊做壓軸好戲，無可否認，確實有氣氛，起碼全場幾乎爆滿，滾石落力演出，勁爆音樂響徹雲霄，重有乜好彈呀。
左丁山花費一千二百八十八元入場，睇十一月七日星期五嗰場，座位認真偏西，坐響度望上舞台，要打側身一百五十度，頸都側晒。未夠八點，入到場，坐到八時四十五分，仍無動靜，開始煩躁之後，大歌星出場嘞，六十歲嘅MickJagger估唔到仍然可以彈吓彈吓，跳跳紮，滿台遊走，唱破喉嚨。佢啲拍檔已經甩頭髮，打鼓嗰位更已白頭，但米積架頭髮長長，腰圍看似廿七、八，犀利噃，佢點樣keepfit㗎？香港二十五歲左右嘅歌星一定冇佢咁嘅活力。睇過「左麟右李」就知道阿倫點樣識走位慳氣啦。外國歌星啲專業精神好令人敬佩，前兩年睇ONJ在會展表演，佢患過癌症，康復後重出江湖。ONJ連唱帶跳，做足兩小時，當時吳光正都睇到大為讚服，話ONJ點似五十歲。
六十歲嘅MickJagger喺接近兩個鐘頭嘅表演中，只休息十五分鐘左右，由KeithRichards頂上，左丁山反為重辛苦，因為添馬艦近西座椅嘅觀眾，一開波就企晒上去，企足兩小時。左丁山坐低就乜都睇唔到，惟有頂硬上，跟埋前後左右嘅鬼佬觀眾一齊癲，到散場之時，成個人散晒。