十九歲性感少女歌手SONIM，近排日練夜練六嚿腹肌，成績有目共睹，簡直係繼美國小天后BritneySpears同韓國女歌手李孝利之後嘅至弗代表！皇天不負有心人，SONIM終於有機會做打片《Ah！一屋之鬥格》嘅主角，一騷苦練嘅成果。
呢套片嘅導演一向拍開AV成人碟，咁SONIM喺入面使唔使犧牲色相呢？話時話，SONIM喺入面唔單止要同格鬥家「肉搏」，重要同大佢幾個碼嘅西洋女子喺沖涼房「苦纏」——我嘅意思係打交決鬥呀！
為咗呢套處女作，SONIM要接受功夫特訓個半月，搞到佢喊咁口話全身肌肉勁痛，重日日冇得瞓，不過SONIM接受訪問嗰陣，依然賣口乖話：「我好鍾意郁動身體，成日喺鏡前面練踢人嘅甫士㗎！俾人打到成身瘀晒都冇所謂，我咁辛苦練咗咁耐，想全部鏡頭都親自上陣！」
大家唔好以為成套戲得個打字，SONIM喺電影入面都會同男星橋本真也有親熱戲，有幾激？SONIM笑住話：「嗰場戲好勁㗎！全套戲入面最好睇！」