阿董問責班子再起內鬥，教統局局長李國章，明寸財政司司長唐英年，八大校長合縱連橫，齊齊反對削減教育經費，理工同城大學生決定下星期罷課，王見秋案未平，又燒到教育嗰瓣，阿董嘅「團隊精神」、「問責制」、「管治新思維」，再次爆現強勁笑位。
王見秋事件，秋官同土共，青筋暴現，破口大罵係「政治迫害」、「傳媒公審」，今次李唐之爭，唔知係阿李國章政治迫害唐英年、定係唐唐政治迫害八大校長，定係聲稱做校長如同做乞兒嘅八大學校長嘅「丐幫」，發動大學生準備公審呢個咁騎呢嘅無能政府？
定係呢鑊嘢，其實由阿董二○○一年施政報告，親口話「十年之內實現六成中學生升大學」開始，又話「增加教育資源絕不手軟」，點知最終又變咗「八萬五」、「高科技港」，全都不存在，大炮車得勁過頭，謊言太過誇張，終於又冇法子收科，阿董要高官問責，又四圍卸責，獨係毫不向自己把口問吓責，終於搞到今日自己審判自己？
阿董若然當初唔係猛咁學阿爺咁超英趕美，畝產萬斤，凡事吹得就吹，但求過骨，博全港市民失憶，阿董就唔會一次次咁自我政治迫害，引火自焚。胡溫猛叫香港人團結，叫土共協助阿董施政，但大學教育假大空，連唐唐同李國章都公開隻揪互踩，阿董有乜本事叫香港人團結？猛車大炮，事後扮聾扮失憶，喺人格上，呢啲咁嘅誠信基本缺陷，搞到政治危機加州山火，四處火光熊熊，又有邊個幫得佢到？
搞成咁，喺阿董嘅陣營，又有兩派意見，一派就梗係賴前朝英國佬，臨撤退搞咁多間大學，如果前殖民地政府唔令到咁多香港下一代受教育，而係製造多啲文盲，冇學位，淨係識得隨街踎同吐痰，阿董今日施政，就會順手好多。
另一派就賴阿松，佢哋好激動咁話阿松做教統會主席嗰陣，將佢喺火紅年代學識嗰套工農兵教育理想喺香港實施，一個都不能少，當教育係一種投資，咁就開大咗個頭，𠵱家阿松就有得攬住個國寶，但個計時炸彈就「扒時」畀阿董攬到實，阿松開倉派米式嘅教育高尚情操，輪到阿董一接就爆煲，證明英國佬臨撤出殖民地埋地雷嗰手陰毒，喺愛國嘅黃面佬之間，原來一樣有衣鉢傳人喎。
教育係一種投資嚟，阿董，聽清楚未呀。係投資，就梗係預咗會損手。唔怕喎，第日大學生太多，叫佢哋上山下鄉，用雙手挖石搬沙、斬樹擔泥開發「大愚山」，啲教育投資點都會收番嘅。
傳真︰2623-9278
電郵︰