祖雲達斯前晚喺意甲聯主場大勝烏甸尼斯四比一，相信唔係乜嘢意外賽果，但有留意比賽過程波友，就肯定同我求大俠一樣，飽食驚風散！
其實祖記上半場已經有同日二十九歲牛一嘅迪比亞路射失十二碼，到下半場十九分鐘更因失十二碼而落後。直到完場前十三分鐘，先至狂風掃落葉連轟四球反勝，其中後備入替前鋒迪華奧及米高利，更加包辦其中三個士哥。
對傷愈嘅迪比亞路來講，射失十二碼，重要被調離場之後，祖記竟然奇迹反勝，呢個生日夠難忘。我求大俠同迪比亞路隊友一樣，同情呢位金童，話晒剛剛復出，意大利報章猛烈批評佢到體無完膚地步，似乎太過武斷喎，話時話，祖記認真勁！
溜馬作客七十六人能夠贏波，功臣非火爆到痹嘅阿達斯莫屬。佢攞成三十分不特止，最抵讚係有球鏟籃，俾七十六人嘅高文打到跌低兼甩牙；嚇到教頭卡里斯利撲出嚟，諗住制止佢郁手，點知阿達斯竟然當乜事都冇，重好冷靜射入埋罰球。難怪賽後米拿讚佢大個仔，識諗咗啦！
做人講實力之餘都好講運氣，好似摩納哥前鋒柏素咁，一直屈居朗達及新加盟的摩連迪斯之下做後備。結果上周歐冠盃因上述兩人受傷，柏素終正選上陣，兼射入四球幫球隊大勝拉科；前日聯賽又靠佢一箭定江山贏波。睇嚟朗、摩兩人好番，都要調返轉頭同柏素爭正選囉！
熱刺前鋒列布夫精通無線電，更喺英格蘭屋企安裝大天線，用嚟同烏克蘭老家親朋戚友通話。不過條天線令鄰居嘅電視受干擾，卒之被人投訴及遭有關部門「通緝」；只要被外借到土耳其費倫巴治嘅列布夫返英國，就有麻煩。乜長途電話費好貴咩？堂堂球星駛唔駛搞成咁！
前阿仙奴名宿阿當斯真係念舊，佢成為乙組韋甘比領隊後，你估佢首個羅致目標係邊個？知唔係佢嘅前英格蘭隊友加斯居尼囉！「肥仔嘜」目前正同狼隊跟操，但重未有聲氣攞到份長約，阿當斯就話：「加斯居尼質素奇高，如果佢有足夠狀態，韋甘比好歡迎佢！」