土瓜灣傲雲峰重推，會所用咗一億元增值，新設施當然要公諸同好。噚日率先介紹「JingleJungle寶貝綠林」主題會所，由於設計概念嚟自熱帶森林，所以請嚟兩隻好精靈嘅馬騮仔做傲雲峰大使，佢哋一男一女，分別叫做Joe同Joey。
發展商之一嘅長實特別整咗本畫冊，介紹會所設施，準備開放示範單位時，送畀小朋友。主題會所嘅設施造型都好特別，好似河馬賽車城，將遙控車場設計成巨型河馬口，重有啲立體布置，例如棕櫚樹、鱷魚先生橋、擺滿卡通人物嘅洗手間，務求令參觀者有如置身童話故事嘅感覺。
要令到大人細路都鍾意個會所，發展商特別度咗啲益智課程，喺啟智樂園，會有導師教琴同埋教上網，可以一邊玩一邊學嘢。
華人置業同泛海集團合作嘅豪宅東半山肇輝臺8號，示範單位開放唔夠一個禮拜，重未公布開售詳情，但市場反應熱烈，四十八個單位，已經有近半獲預留。美聯執行董事陳坤興話，該公司佔咗十宗，率先可以跳bar，攞到最高嘅2%佣金。
美聯助理區域經理劉文華補充，買家通常預留一個單位，最多都係兩間。佢透露，每間代理行做到八個單位至可以跳bar。華置助理董事凌緣庭日前同美聯主管食晏，表揚佢哋嘅成績。
肇輝臺8號獲預留嘅單位，呎價由四千六百至六千八百蚊，價錢最平都接近一千一百六十九萬，最貴嗰間就要二千零九十萬。
另外，講開豪宅，富豪酒店嘅赤柱富豪海灣，市傳獲買家一口氣掃入超過十個單位，估計涉資逾三億元。
靜咗一輪嘅樓市，好似又見熱鬧，皆因矚目大盤將軍澳蔚藍灣畔開賣。呢個被視為今年壓軸大型新盤之一嘅項目，各區代理空群而出，希望過肥年。
呢個喺正地鐵上蓋嘅屋苑，有二千幾個單位，銷情對後市絕對有影響。所以，唔單止代理緊張，發展商就更加肉緊。
發展商之一嘅信和置業主席黃志祥，剛過去嘅周六日，親自到售樓處視察銷情同市場反應，除咗朝早現身，夜晚十點幾重四周圍巡視售樓處，向現場嘅代理高層查詢市況，交流意見，以便掌握最前線資料。
零售市道喺自由行實施之後逐漸好轉，市場對嚟緊嘅黃金檔期聖誕節，自然寄予厚望，因此，地鐵提早為旗下九龍灣德福廣場搞聖誕布置，以「華麗宮庭舞會」做主題。地鐵總共用咗二百萬銀為商場裝身，工程預期今個月中完成，率先迎聖誕。
聽講商場二期會有一棵三十呎高嘅聖誕樹，由兩萬朵水晶聖誕花堆砌而成，係全場焦點所在。
地鐵高級商場市務經理陳嘉明話，估計聖誕節期間，商場人流同營業額都可以增加兩成。
蘭西
電郵地址：
