SCE首個恐佈大作《Siren》驚嚇過貞子

SCE今年東京遊戲展中，除GT4外，力谷嘅大Game就要數呢隻恐怖大作《Siren》，SCE為咗令試玩者能親身感受遊戲嘅驚慄感，更專登搭建一間同遊戲內相似嘅木屋成為試玩區，可見《Siren》矚目程度。《Siren》剛剛抵港，不過咪話小記嚇你，其驚嚇程度直逼《午夜凶鈴》嘅貞子，就睇你有冇膽玩。

記者：許福合

發售日：11月6日
開發：SonyComputerEntertainmentInc.
類型：Adventure
行貨價格：$288
Copyright：(c)SonyComputerEntertainmentInc.

以往SCE推出嘅遊戲一向都老少咸宜，不過呢次《Siren》講到明向15歲以上推薦，計小記話重要個膽夠大先啱玩！記得當年嚇得唔少人尖叫嘅日本片《午夜凶鈴》，《Siren》嘅畫面到音效就有幾分相似，典型日本恐怖片風格，場景多數係陰暗環境，而每完成一個過版條件，都會有過場動畫，而當中角色同怪物，全部用真人化妝加貼圖效果而成，面部因痛苦而扭曲表情相當逼真，一路玩都覺得有啲心寒！

首創怪物視點
呢類遊戲通常躲躲藏藏前進最好，不過當突然閃過一個紅色畫面時，就代表被怪物發現，此時應立即啟動《Siren》嘅特殊系統「視點截取」，開啟後畫面會見到一片雪花，只要使用控掣桿，扭啱角度就可以截取對方視點，除咗可以確認位置外，更可以從怪物角度觀察環境，當見到佢向着自己走過嚟，你都咪話唔驚！整個遊戲大致上，可分為多個小段進行，每段皆要完成過關條件，最難之處係不設有地圖，喺黑暗環境認路非常困難，另外亦要小心敵人放冷槍。

■遊戲中嘅角色都以真人扮演，唔怪得咁逼真。

■死屍全部打不死，一段時間後又會翻生。

怪物角度睇番自己！
■開啟視點截取後，圖中出現十字就係玩家所控制嘅角色。

■赤手空拳面對死屍一定唔夠打，走為上着。

武器各有不同
遊戲內一共有21個角色，各自有唔同身份，處身位置亦有分別，不過玩家基本上唔使理會，只要按照時間表，就可體驗到各人嘅冒險。每個角色各自有唔同武器同裝備，好似一開始主角須田恭也，起初就只得一支電筒，當被死屍警察追趕時，就只能關上電筒，利用黑暗環境躲藏；另外亦有揸長槍嘅老伯，可遠距離一槍擊斃怪物，不過埋身肉搏就只有束手就擒。

■呢位警察叔叔食緊乜？

■遊戲中出現嘅警鐘及鎖匙，都可能係過版關鍵，記緊檢查一下。

■快關上電筒，躲喺枱下吧！

SonyHK
查詢電話：23452966

■使用長槍就有瞄準器，而且一槍就可擊倒敵人。

■就算有武器都要小心攻擊，一擊不中就危險。