以前拍過唔少英雄片嘅禿頭男星，近呢幾個月都喺內地拍緊戲，但佢就真係好唔生性，趁老婆長年住喺外地，自己就成日偷食「沙沙滾」。最近佢連喺內地請嘅女助手都唔放過，重瞓埋同一間房，直情當啲工作人員盲嘅，好鬼離譜！
禿頭男星成日自命有型靚仔，可能佢重停留喺十幾年前，冇留意自己髮線向後移，已經去到拍清裝唔使黐頭套嘅境界，但有啲內地姑娘見到佢都重冧嘅。
禿頭男星近排喺內地開工，請咗一個植咗眼睫毛嘅內地姑娘做私人助手，初頭大家都唔為意，但睇見佢兩個成日喺片場眉來眼去，又公然打情罵俏，最好笑嘅係當大家食飯嘅時候，唔係女助手照顧禿頭男星，反而調番轉由男星幫女助手攞飯盒，爭在未餵埋佢食啫！
攞飯盒都事小，當禿頭男星有紳士風度，但佢同女助手住埋同一間房，咁就大件事啦，孤男寡女共處一室，話佢哋冇景轟，怕且講都冇人信啦！
黃秋生前晚同一外籍靚女睇《維港巨星匯》，佢日前接受由毛舜筠主持嘅商台節目訪問時，罕有地講佢嘅老婆同囝囝，問佢點教仔？秋生就話：「粗口可以講，不過講完要負責任。」𠵱家啲人鍾意就問候人哋父母，與其教啲仔女負責，不如教佢哋保持個人修養，唔好講粗口咪重簡單！
美國過氣天后瑪麗嘉兒（MariahCarey），噚日去咗上海出席記招，宣傳佢聽日同大後日喺虹口體育館舉行嘅首場內地演唱會。據講今次瑪麗去到上海嘅排場好犀利，淨係保鑣都有二十人，瑪麗唔單止包起咗希爾頓酒店頂樓兩層總統套房，重下令房裏面嘅布置都要有東方特色，床邊要有六個濕度調節器，所有窗門都要用黑紙封住，真係奄尖夾腥悶！
王菲日前接受商台節目《雲妮鍾情》訪問，阿菲唔知係咪受男友謝霆鋒影響，最近鍾意咗上網玩啤牌遊戲，佢話呢個遊戲會按照分數決定你做人嘅等級，好似庶民或者狀元咁。提到年底演唱會，阿菲話唔係好想唱番自己啲舊歌，希望可以重新編曲先唱。
組合Boy'Z嘅張致恆（Steven）噚日十九歲生日，佢同埋二百個fans去旺角一間壽司店慶祝，而佢嘅拍檔關智斌（Kenny）就送上一架Trikke三輪腳踏車。Kenny喺Steven切蛋糕許願時，就偷偷哋揩定啲忌廉，等Steven一擘大眼就揩到佢成塊面都係忌廉。但係Steven都即時向Kenny反擊。唉，咁大個仔，重玩忌廉！
顧紀筠早前用十二萬搵設計師朋友造咗四件性感晚裝，預備無綫台慶時用。噚日顧紀筠去咗柴灣試衫，佢重話每年為台慶揀衫都好頭痛，又驚同其他姐級司儀撞色，又怕俾人話博搶鏡。問顧紀筠如果着得太性感，驚唔驚俾老公鬧？佢竟然話：「我老公尺度重大過我！」
