英國萬人迷碧咸（DavidBeckham）嘅愛妻Victoria形象真係唔多討好，佢張新碟未推出已經俾人踩到一文不值，據講Victoria為咗挽回頹勢，最近有意炮製一套電視紀錄片催谷新碟，不過佢為咗自己嘅歌唱事業，居然連老公碧咸同兩個囝囝嘅私隱都要出賣，重搞到唱片公司要裁員！
我羅拉噚日八到料，話Victoria知道監製DamonDash為咗撐佢而同唱片公司Telstar鬧翻單嘢已經通晒天，所以希望炮製一輯電視紀錄片改變大家對佢嘅睇法，而呢輯紀錄片會收錄佢一家四口搬到馬德里前後嘅生活片段同埋新碟錄音過程，內容離唔開天倫樂呢啲溫情泛濫嘅鏡頭。
據聞Victoria呢個如意算盤都打得響，事關英國好多間電視台都有意買入呢套紀錄片，不過我羅拉擔心電視台會cut晒Victoria嘅片段，淨係播佢老公同囝囝嘅靚樣。
Victoria隻新碟能唔能夠成為大熱作品，似乎言之過早，不過Telstar早前耗資近二千萬港紙為Victoria造碟，令到公司出現財政問題，結果要裁員止血，聽講Telstar最近就有十名員工痛失飯碗，真係冇陰公！