K醫生臨時打電話嚟，邀約去美國會所食午飯。本來已經訂咗FCC午餐，聽路透社大員夫子自道，講路透社如何應付本身嘅負面新聞。不過K醫生盛意拳拳，惟有撻訂唔去FCC，立即去美國會所四十八樓BostonClippers食其小型自助餐。
從四十八樓望出去，啱啱俾國金二期遮去唔少海景。K醫生話：「好多人話填海對風水唔好，我唔信風水嘅，但係呢度望落去，再填海嘅話，維港就冇嘢睇咯喎！」當然同意啦，唔係我哋做乜嘢反填海。望過去西九龍，幅地皮係好大，大成點，唔清楚，記得一位測量師話：「西九龍面積大概等於尖東加尖西！」嘩，咁就好犀利，唔怪得係兵家必爭之地，搞到曾蔭權頭赤，唔知點收科。
片刻之後，泊車W與陶傑殺到，陶傑話泊車W功德無量，泊車費五蚊一個鐘益街坊之餘，亦令好多人有生意做，包括的士在內。因為好多人在此泊車，跟住在停車場外搭的士去銅鑼灣或上環也。泊車W話：「停車場係臨時合約，政府攞番幅地嚟做維港巨星匯，即刻冇得做咯。」巨星匯在星期日之後就冇啦，添馬艦地皮唔用嚟做臨時停車場，有乜好做？如果再度投標，泊車W話會考慮考慮。
陶傑寫稿，揮灑自如，唔似得左丁山咁辛苦，佢施施然食完飯之後，先至由K醫生帶佢喺美國會所搵傳真機，傳稿返《蘋果》，泊車W跟住就返澳洲，佢搭國泰客機多過左丁山搭巴士，K醫生叫左丁山介紹陳南祿畀泊車W，攞番張九折咭喎！