新車速報：<br>平治CLK200Kompressor新偈增賣力

新車速報：
平治CLK200Kompressor新偈增賣力

最近，平治代理繼引進全新配用3.7公升偈嘅SL350抵港後，日前又引入埋全新CLK200Kompressor型號；新車外表吸引之餘，車廂設備又齊全，而一台1.8公升Kompressor偈又見有充裕動力輸出，加上低耗油量嘅特性，絕能迎合一眾香港車迷嘅要求呢！
記者：何永仁
攝影：陳偉強
ImageGirl：瑤（Imagine）
車輛提供：仁孚行（28957288）

向來備受車迷追捧嘅平治CLK，自新一代型號在港推出以來，一直叫好又叫座；至於今勻代理引入配用1.8公升機械增壓引擎嘅CLK200Kompressor型號，就更具有一份吸引力，因其不但樣靚設備齊，引擎輸出又見柔韌有力，加上以一套5前速半自動波箱作配搭，性能表現可謂毋庸置疑。





跑車造型惹人好感
與其他型號一樣，呢部新抵港嘅CLK200KompressorAvantgarde，其造型設計望落亦有吸引力；除擁有流線型車體設計外，一對炯炯有神嘅大燈襯以闊大鬼面罩組合，亦能令車首顯現出一份誘人魅力。鴨尾狀嘅車尾附以煞車燈組合，除有穩壓作用之餘，而且重增添有多一份安全感。

■無B柱設計，可給予車上乘客更佳視野範圍。

■鴨尾狀車尾設計可有穩壓作用外，另附有煞車燈組合。





闊落車廂享受高
新車嘅車廂配搭亦具有一定嘅吸引力，空間寬敞闊落唔在講，前後兩排以高級真皮鑲嵌嘅座椅承托力十足，後排更設有冷氣送風口，享受至愜意；除此之外，遇有需要時更可將後排椅背收摺放平，以便從車廂提存儲於尾廂嘅物件㗎！設備配搭方面，電窗、電鏡、高級音響及原廠恒溫冷氣可謂一應俱全，用落亦見方便，當然唔少得備有各設備遙控鍵嘅四幅式真皮軚環，同埋多個安全氣袋配搭啦！

■中控台上有齊恒溫冷氣及高級音響組合，一應俱全。

■一雙仿桶形前座承托力甚豐，雙色配襯亦見吸引。






Kompressor引擎柔韌有力
大家眼前呢部全新CLK200KompressorAvantgarde，就改以一台1.8公升直4Kompressor引擎作核心，馬力輸出充裕唔在講，當引擎處於3000-4000rpm時，經已發出高達24.5kgm嘅扭力峯值，匹配一套5前速半自動波箱，起跑加速反應敏捷，兼有低耗油量嘅特性，絕能迎合本港路面環境需要。另外，一套出色嘅懸掛組合加上四輪高效能碟式制動，以及多套電子系統輔助，亦能予人出眾嘅操控表現，同埋收放自如嘅效果㗎！

■一套5前速半自動波轉檔靈敏暢順，並讓引擎發揮至極。

■將後排椅背覆摺放平，可從車廂提存儲於尾廂嘅物件。

■電天窗旁備有獨立照明外，兩旁另設有扶手方便出入。

■後排設有冷氣送風口，享受至高。

記者評語：新偈表現佳
新一代平治CLK不但外觀獨特吸引，車廂配搭出眾之餘，呢部全新CLK200KompressorAvantgarde換裝上一台1.8公升機械增壓偈，性能表現絕不遜色，匹配一套5前速半自動波箱，起跑加速更見敏捷有勁。

瑤評語：樣靚坐得舒適
新版平治CLK賣相較前變得年輕吸引，就連呢部新車亦唔例外，車廂空間寬敞闊落，加上座椅承托力甚豐及齊全設備，乘坐倍見愜意。

平治CLK200KompressorAvantgarde規格
引擎：1796cc直4DOHC；馬力：163ps/5500rpm
扭力：24.5kgm/3000-4000rpm；傳動：5前速半自動波
懸掛：（前）麥花臣支柱（後）多連桿；制動：（前）透氣碟（後）碟式（ABS）
輪胎：（前）205/55R16（後）225/50R16；尺碼：4638×1740×1413mm
軸距：2715mm；車重：1540kg
0-100公里：9.9秒；極速：228km/h；平均耗油：8.7L/100km

■新車配用一台1.8公升機械增壓引擎，輸出充裕有勁，並能切合本港路面環境需要。

■尾冚開啟幅度大，加上低重心設計，提存行李方便容易。