日本人酷愛Mac！單睇佢哋啲第三廠，成日出Apple周邊嘢就知啦！最近日本SUNTACBB，就專為iPod出咗部FMTM-101嘅FM調頻發射器！
睇個名好似好複雜，其實簡單啲講，佢係一部具有FM訊號發射功能嘅周邊；只要利用FMTM-101內置3.5mm音頻輸入插（俗稱針插），接駁上iPod之上，佢就可以透過FM頻道，將iPod內嘅音樂，發送至收音機內收聽，所以用嚟駁汽車或家庭Hi-Fi聽MP3，真係免除咗好多駁線嘅麻煩！基本FM頻道有三個選擇，分別為88.2MHz、88.6MHz及89.0MHz，相信香港收音機都可以適用。
機身設計亦非常啜核，採用同iPod匹配嘅白殼設計，已經叫一眾Mac迷愛不釋手，加上機頂有一個大吸盤，可以將iPod斜放固定起來，賣相同新枱燈形iMac真係幾分相似，勁搞鬼！預計此機會在日本12月頭推出，估計價錢約5,980日圓，折算港幣$400左右，非常抵買。
記者：朱崇德