究竟係大家炒到冇嘢好炒，定係有人不甘寂寞？好多隻上市之初炒得好勁，之後轉趨沉寂的股份最近再度燃起炒風，好似做味精嘅味丹國際（2317）同埋東瑞製藥（2348），在上周突然起步翻炒。
東瑞在上周五急升後，噚日升勢放緩，最高見過0.90元，收0.87元，只係上升1.16%，成交金額仍有812萬元，
經紀陳話，東瑞上市之初，一度受匿名信事件影響，所以唔多唔少打擊芬佬嘅信心，亦令隻股上市至今，股價表現一般。不過，幫呢隻股份上市嘅有關人等並未放棄，近期由同一保薦人搞上市的北泰（2339），股價表現非常之掂，所以有人番轉頭幫幫東瑞，亦一啲唔出奇。
不過，小初就有些少擔心，呢期藥股好似唔多流行，唔知搞唔搞得起隻股呢？
另外，就快搞合股嘅升岡國際（485），今日公布中期業績。經紀陳話，據聞業績應該唔錯，如果唔係咁，點對得住喺早排批股接咗貨嘅芬佬？
慕容小初