鄭少秋係香港第一個秋官，股市怕晒佢，因為每一次秋官劇集登場，股市就跌之故。今年秋官出台，股市繼續升，一於冇有怕，據藺常念講，元朗南生圍無端端出現一條大鱷，鱷魚在河水橫行，魚蝦蟹都成為佢嘅腹中食物，既然「丁蟹」俾大鱷食晒，大閘蟹唔敢郁，股市焉能不升？
左丁山就話有另一個原因。數字上有負負得正，估唔到今年會出現另一個秋官—王見秋，第一個秋官對股市唔好，第二個秋官對官場不利，豈非負負得正？不過見秋官自動鬆人，少秋官嘅負面影響就顯著得多喎，唔怪得見秋官宣布辭職之日（上星期四），恒生指數就應聲下跌二百八十八點。
為今之計，不如首先保護條南生圍大鱷，唔好射殺佢呀，否則大鱷一去，丁蟹再度浮出河面，股市容乜易冧？
講起見秋官，好多人冇乜理性兼冇理智，因為見秋官話：凡有理性理智嘅市民，都知道佢受到傳媒迫害、政治迫害（大意如此）。律師E出身港大法律系，呢日與同學聚餐，當中有律師、大律師、資深大律師、法官、高官，個個都識得見秋官。佢哋對見秋官辭職嘅反應如何呢？據律師E講：「港大法律系培養出一班冇理性、不理智嘅法律界人士。」嗒落有味！律師E警告左丁山：「你哋班冇理性、不理智嘅傳媒人，冇秋官畀你kickaround嘞，抵你哋死！」呢句話乜好似係尼克遜大選輸畀甘迺迪之後，向傳媒嘅發洩說話，又睇吓秋官會否捲土重來？