和黃（013）英國3G業務，早前有啲麻煩。和黃揸65%，荷蘭KPN揸15%，KPN唔肯夾錢，搞到上法院。事件𠵱家擺平，和黃買埋KPN嘅15%，作價11.6億元，係3年前和黃賣畀KPN價錢嘅10%。
單嘢對和黃嘅影響，壞嘅方面係英國3G跌價跌得咁淒涼，須知和黃本身重有65%在手，不過和黃表示作價只係協議結果，唔代表真正價值。好嘅方面則係當年賣畀KPN，所得收益並未入帳，𠵱家低價買番，帳面上會有盈利104億元，目前未定會否入今年帳目。
似乎單嘢至少心理上對和黃有利，上周五晚倫敦港股偏軟，和黃則偏硬。KPN退出，少咗一個不明朗因素，相信芬佬對和黃嘅興趣會增加，買盤會多啲，可以諗吓和黃Call輪短炒。
炒和黃Call輪揀對象，必然係9066同9914一對，9066比較搏殺格，9914則數據靚啲。
假期新樓盤去銷成績唔錯，地產股估計會有啲睇頭，可以搵啲新地（016）Call輪玩吓短線遊戲，近期輪交投唔活，只適宜揀遠期輪9161同9107，兩隻到期日差唔多，9107槓桿率細啲，但溢價着數好多，就呢隻。
章 盛