港股升越萬二大關，已有大半個月，其中有一日大跌501點，但跌穿之後，僅整固兩日，又上番去，且創出12537的另一個高點，市底實在好強。
今個升浪，雖然恒指已上升逾4200點，升幅50%，理論上，中期調整隨時會出現，但同芬佬茶敍打牙骱，佢哋話後市發展可能令人大出意外，主要原因係基金同大行今次全情入市，貨源已歸晒邊，大市在萬二關水平整固後，升勢有可能再起，甚至會向13500至14000推進。
事實上，今次長達半年的升市，好多散戶都搵到錢，唔少陳年蟹貨亦鬆綁，家吓散戶好機靈，走位靈活，一有風吹草動，就沽咗先算。𠵱家嘅散戶，真係好輕身，手上有幾多貨，比升市前多咗抑或少咗，相信大家都心中有數。形勢比人強，貨源既已盡在大戶手中，大市點會大跌，甚至連正常嘅一千幾百點「中調」亦未必會出現。大戶要操上去，可以升到你唔信。
不過，坦白講，後市雖然睇好，而且會大升，明年恒指真係好大機會升到14000，但現時若先出現「中調」，整固後再上，會更為健康。
基金要造上去，佢哋睇好嘅股票，自必然會率先發動，彩星集團（635）在高位整固個多月後，近日已開始有番勢，股價亦重上10日同20日線之上，幾家大行最近都出報告，推介買入，目標價由2.25元至2.5元。
彩星今年重新推出忍者龜系列，銷情比預期為佳，玩具業界亦預期，忍者龜將會成為今年聖誕檔期最暢銷的玩具，今年盈利肯定大增，明後兩年亦可保持高增長。
綜合大行預測，彩星03年度（12月年結）、04及05年度盈利分別為1億、2.2億及3.5億元，每股盈利分別為8仙、17仙及27仙，05年度預測PE僅為6倍。
彩星8月中由0.8元起步，升上1.79元後整固，形成大形三角形，衝破1.7元的降軌阻力，量度上升目標指向2.7元。
郭兆誠