王官雖然執咗包袱，留低平機會呢個爛攤，冇人敢空降，好似切爾諾貝爾大災難咁，冇錯，間核電廠石墨反應堆過熱大爆炸，火頭就救熄咗嘞，之但係，留低嘅核輻射，就會繼續多幾百年，喺災場一帶，生出嚟嘅BB，幾代都會有四隻腳兩隻手，生出嚟嘅雞，會有兩個頭、三隻翼，生態大災難，都咪話唔煩。
平機會主席呢把交椅，𠵱家就充滿政治輻射，邊個坐上去，都會致癌。阿董想再任命，已經冇可能，因為佢嘅眼光，由委任梁錦松到王見秋，都已經證實咗係害死當事人。中環人耳語：如果同邊個有仇，最好就係向阿董引薦佢，等阿董隻金手指一篤，佢就家山有福。重有人講：如果俾阿董禮賢下士睇中咗，阿董猛話你係人才，好誠懇咁邀請你上船，加入問責團隊，就真係要去大口環驗一驗個腦，做一個IQ測驗套餐，睇吓自己有冇先天智障症。
喺咁嘅情況之下，試問喺香港又點會搵到平機會新主席人選？本來論資排輩，好似當年尤德暴斃咗，自然就輪到衛奕信補位一樣，平機會主席最佳人選本應係鄔維庸至啱。鄔醫生挺董保王，一向都打大赤肋上。秋官慘遭政迫（即係「政治迫害」嘅簡稱），飲恨落台，只有鄔醫生可以繼承遺志，同阿董心意相通，將清除港英地雷嘅民族解放大業進行到底，包括懲處臨陣叛變嘅投機分子周永新等。但係阿董經一事長一智，眼見呢幾日公眾倒王同反鄔嘅民憤一樣高漲，除非胡溫同曾慶紅哋打電話親自落柯打點名，由國家負責任，否則阿董可能都重驚咁樣做會激發另一場五十萬人大遊行，平機會新主席，如果採取「侯賽因傳位方案」──即是「鄔代」，阿董膽博膽，可能性都係同大亞灣核電廠爆炸差唔多。
既然咁，就無謂煩，不如好似巨星匯咁，將個位外判外聘，喺歐美列強國家之中，另聘鬼頭出任。話時話，香港百年以來，領導港人搞開機會平等反歧視人權運動專家搞得出樣，。
搵個鬼嚟，講嘢特別權威，各方都會心服口服，由高官到議員，冇人敢駁嘴。唔使怕請外鬼，會養唔熟，加速反中亂港喎，美商會主席詹康信就親中挺董嘞，話唔定洋人學得華兒語，爬上城頭罵洋人，會罵得重勁揪啲，唔見杜葉錫恩到咗八十幾歲，鬧肥彭、鬧布殊、鬧李柱銘，機會一律平等咩。
傳真︰2623-9278
電郵︰
