新股北泰（2339）上市以來，對公眾一直保持低調，但在基金投資界就一啲都唔低調，公司管理層與芬佬接觸甚為頻密，所以上市冇耐，就已經有唔少基金坐咗貨。
北泰聯同多隻股份，今日跟隨瑞士一波出發到海外做路演，首站係星洲，跟住就會去倫敦，然後再去紐約。據講今次去路演的公司，主要係一啲未被芬佬廣為熟悉的股份，北泰雖然新上市，但話晒有潛質，所以亦有份。
北泰上市以來，股價一直穩步上升，上周五更大升11.98%，收2.15元，成交股數3386萬股，金額7009萬元。
經紀黃話，由於隻股突然抽得咁急，所以短期內或有獲利回吐。不過，就算以現價2.15元的上市新高計，在芬佬心目中，仍然覺得隻股便宜。
另外，經紀黃又提起另一隻新晉基金股魏橋紡織（2698），上市之初一度備受追捧，但之後股價表現就差強人意，主要原因係受棉花價格勁升影響。經紀黃話，有人拍心口話公司盈利不受影響，得到唔少芬佬相信，所以密密收貨，因此後市不能睇得太淡。
慕容小初