上星期亞Mark曾經透露過，話大昌行旗下嘅本田、奧迪及福士為要資源增值，總舵手麥Sir絞盡腦汁諗出一連串行動，但想唔到旗下賓利汽車嘅話事人——AlbertHui，此刻突然向麥Sir請辭，據知Albert想趁機休息之餘，佢遲吓重話諗住搞搞新意思，學人創業咁話；究竟Albert會否真的脫離本地車行，亞Mark暫且賣個關子，之不過總舵手嘅麥Sir，傾刻間經已當機立斷，搵到位資深嘅車行中人接替Albert原有位置。呢位仁兄響本地車行既有豐富嘅管理經驗外，最重要係有銷售豪華轎車嘅實質紀錄嘛！事關明年初賓利不單止正式引入ContinentalGT跑車，聽聞響國內已售出三部嘅賓利ArnageLimousine特長版豪華轎車，亦有望於今年底前跟香港車迷見面；講份量講氣派，佢絕對媲美平治Maybach同納入寶馬嘅勞斯萊斯Phantom之餘，呢部賓利ArnageLimousine車價更勝一籌，大約要賣過千萬港元㗎！有興趣想知神秘人係邊個，同埋想睇吓咁豪嘅賓利ArnageLimousine的話，就真係要拭目以待喇！