韋斯咸前晚主場對西布朗，重演前幾周狼隊反勝李斯特城四比三嘅歷史，不過韋斯咸係領先三球後反輸嗰隊噃，重已錄得近六場聯賽未嘗一勝劣績，已經跌到第六位！
其實，繼被炒嘅羅達及臨時領隊布祿瓊後，現任嘅柏度已經係今季第三位韋斯咸領隊！而每位領隊在任時又喜歡簽新球員返嚟，令到陣容亦經常變動，班波無法成形，有乜辦法唔散吖！
我求大俠都唔想見到呢支傳統上好少換領隊嘅球隊，今季有第四個領隊出現，祝福佢哋快快走過低潮啦。
拉科喺上個禮拜歐冠盃以三比八大敗畀摩納哥單嘢，原來問題出自門將摩連拿，求大俠唔係話呢個只踢咗上半場嘅龍門打假波，而係佢原來之前一晚腸胃已經唔多妥，但係頂硬上，終於上半場佢已經失咗五球，所以話一個人要自量，否則會害死隊波同埋捧你隊波嘅波友。
荷甲聯以往鬥嚟鬥去都得阿積士、恩浩雲同飛燕諾三頭馬車，但今屆唔同，艾克馬亞異軍突起，上次見到佢哋迫到阿積士冇氣唞，喺上星期六佢哋作客比達，梗係信名家吾中買番啲艾克馬亞，結果得手。佢哋喺聯賽同阿積士平頭領先（未計周日戰果），認真唔講得笑。
阿根廷國腳奧迪加年前加盟土耳其球會費倫巴治，但踢咗無耐就同球會鬧不快，玩失蹤離隊。終於國際足協出面，判定奧迪加要向費隊賠償八千五百萬港元嘅毀約費，我求大俠都覺得合理。點知奧迪加話冇錢賠，最多以後唔踢波收山喎！咁賴皮都得？奧迪加你都算人辦囉！
英甲球隊巴拉福特打和華素爾，錄得近十一場聯賽不勝，會方即時響官方網公布解僱領隊力奇羅，但就冇直接通知佢本人噃！難為力奇羅賽後對記者講，重話有信心帶領球隊返勝軌！究竟係會方唔好意思開口，定係想等力奇羅返到屋企上網時，畀個「驚喜」佢呢？