民建聯立法會議員劉江華，一向嘅攝石黐身功都好出名，趁太空人楊利偉來港時顯出力爭上游嘅拼勁，喺禮賓府三扒兩撥就攝咗埋「偉哥」身邊，八方喺電視睇到呢手能人所不能嘅絕招，拍案叫絕兼自愧不如，但原來劉江華使出絕招並唔係獨食咁自私，反而大益街坊。
有馬鞍山頌安邨居民報料，話劉江華同「徒弟」陳克勤擺咗幾張紙板喺街邊，貼滿晒劉江華當日同楊利偉嘅合照，重聲明話可以收錢幫街坊「覆晒」留念，淨係楊利偉都夠號召力啦，加埋劉江華個樣，肯定好賣過Twins啲相，由於劉江華同陳克勤都係區議會選舉候選人，所以選舉事務處發言人話，若未得楊利偉同意就借佢做宣傳，劉江華隨時觸犯《選舉（舞弊及非法行為）條例》，後果可大可小，咦，偉哥幫番愛國撐董嘅民建聯，乜唔係天公地道咩？全套戲係由胡溫哋一手監製，到偉哥唔同意？
傳真︰2623-9278
電郵︰