過氣樂壇小天后BritneySpears，早排搭上咗一位有個大肚老婆嘅黑人舞蹈員ColumbusShort，不知幾咁風騷。不過Britney早前自稱捱病咗，連「MTV歐洲音獎頒獎禮」呢啲咁大型嘅騷都缺席唔去，原來背後真正嘅原因，係佢最近又俾人飛咗，要匿埋治情傷，所以出席唔到！
Britney早前搭上個有婦之夫，雖然人人都話佢搶人老公好唔啱，但係Britney都充耳不聞，為咗𠱁Columbus開心，佢兩個早前更去咗意大利同紐約，玩到樂不思蜀。
不過呢個夢發咗足足三個月後終於幻滅，因為Columbus最後都良心發現返番老婆身邊，所以同Britney講分手，Britney傷心到即刻飛返路易斯安那州嘅屋企，要阿爸阿媽呵番。
據英國嘅小報爆料，一而再俾男友飛嘅Britney，今次真係傷心得好緊要，就連新碟嘅宣傳工作都唔理咁多。早兩日佢喺家鄉嗰陣，去到邊都黑口黑面，重有兩個口靚仔fans想問佢攞簽名，結果俾Britney鬧到狗血淋頭，Britney嘅情路上多番波折，試問有乜計唔躁先得㗎？