由每年一度變為差唔多每季一度嘅《機械人大戰》，今集以真實比例加半實時戰鬥喺PS2登場，行貨定價$480，比一般Game貴，所以反應真係麻麻，現市價回落至$450左右。
恐怖遊戲方面，雖然月中嚟緊有隻《零～紅之蝶》，不過《SIREN》反應就比較理想，市場消化分分鐘比《機戰SC》好，可能同佢嶄新換視點玩法有關，市價約$280-$290。日版遊戲《人生遊戲EX2》亦返咗貨，有玩開上集記得留意。至於GC嘅《MARIOKARTDoubleDash!!》亦非常熱賣，相信有GC主機嘅都唔會放過，而且市價都係$360-$370左右。
XBOX月尾推出嘅大作《ProjectGrahamRacing2》，據消息今次除咗比日美版更早推出外，只有預訂先送嘅遙控車將極之缺貨，有興趣就好去訂定。而EA發行嘅《魔戒3》亦已到貨，市價約$270左右。
繼《GT4》版陶瓷白PS2，日本SCE又公布推出百式「專用」金色嘅PS2主機！呢部機係專為嚟緊《機動戰士ZGUNDAM奧干VS泰坦斯》設計，跟機有兩個金色手掣、ZGUNDAM特別版8MB記憶卡同遊戲碟；推出日期12月4日，日本定價35,000日圓，折算港幣$2,275，但由於係限量版，相信來貨一定少，炒上天價勢所必然！
文：打機鐵人
