楊紫瓊、鄺美雲及徐濠縈等前日到中環出席Spa開幕活動，徐濠縈提到男友陳奕迅與何超儀在《豪情》一片中有摸胸等大膽床上戲，她自歎不如，並很佩服兩人勇敢投入，調轉是她和陳子聰拍必定十分尷尬。
前日護膚品牌Valmont旗下的Spa在中環開幕，請來楊紫瓊和鄺美雲擔任剪綵嘉賓，其他嘉賓包括徐濠縈、黃偉文和陳霽平等。
賭王何鴻燊千金何超儀（Josie）和男友陳子聰本周在澳洲舉行婚禮，擔任伴娘的徐濠縈自爆成功減去十磅，她說：「伴娘裙都係Josie搞，我未睇過，今次第二次做伴娘，得番一個限額，唔再做囉！我都怕嫁唔出㗎。我今年二十九歲，除非有咗，否則希望三十歲前結婚都冇乜可能。」
提到男友陳奕迅（Eason）與何超儀在三級片《豪情》中，有意識大膽的床上戲，如Eason摸Josie胸等，徐濠縈說：「未睇喎！佢哋兩個咁friend，又真係好鍾意演戲，好勇敢！如果要我同陳子聰做，真係尷尬死！」
問徐濠縈有否妒忌和呷醋？她說：「唔會，大家咁熟，我信得過朋友同男朋友。重有，我有大把線眼，好有信心！如果唔係Josie，係其他女仔都照咁拍㗎啦，我自己就唔得喇。我覺得佢哋好犀利，真係應該提名攞獎！」
而鄺美雲則開心地展示比熊寵物犬的照片，她說：「佢叫Cash，因為人人都鍾意現金㗎，佢重跟我姓，叫CashKong，即係金礦！𠵱家我成日帶佢去受訓，學跨欄等，希望將來陪我探訪老人、兒童做義工。」
提到早前賭王四姨太梁安琪公開叫鄺美雲為「No.5」，鄺美雲神態自若說：「陳嵐（向華強太太）一年前喺拉斯維加斯賭場玩百家樂甩牌，已經成日咁玩，重越洋問我有冇打噴嚏。如果（傳聞）係真，就會介意，都唔係真，我梗係唔會介意啦！」
採訪：RitaLeung 攝影：ChenWaiOn、EdwardChou
