秋官下台，有人笑說因為佢改壞名，叫做阿秋，古代斬決人犯，都等到秋後，所以秋官過唔到立冬之日，即係上周六，係命中註定嘅。
點解秋官老竇咁英明，可以預見個仔命中秋天有一劫，改個仔個名叫「見秋」，睇怕要秋官先知，𠵱家佢老人家心情咁差，出於人道理由，梗係冇人敢問啦。
八方計一計，特區政府自成立以來，請辭嘅高官或領導愈嚟愈頻密，換畫速度亦愈嚟愈快。最早話要走嘅係王䓪鳴，佢阿姐當年要辭房委會主席以示對短樁負責，但老董死唔肯放人，終於拖拖拉拉先至走到，兩敗俱傷。
阿董最唔捨得係佢位家臣鸚鵡祥，但係連鄭耀宗都冇得做港大校長，去「提點」佢嘅路祥安冇理由有得留低，終於咪「壯士斷臂」。
阿松係董太至愛，上場兩年就搞單偷步買車事件，老董點包庇都搞唔掂，所謂愈揭愈醜，擒擒青坐埋「不得人心」嘅葉劉順風車，同日唔撈。
所以話，秋官已經好好彩，三個月就決生死，相當痛快，好過拖長嚟凌遲，中環人一聽到老董個名，一早就識閃開，秋官莫非真的不食人間煙火，唔知一個「董」字，時價值幾多錢？
傳真︰2623-9278
電郵︰