謝霆鋒、成龍、尹子維同蔣怡噚日喺中環海港政府大樓外牆拍《新警察故事》，呢幕外牆追逐戲拍得好誇張，先係霆鋒同成龍個替身喺二十七樓高外牆倒吊飛落地面。霆鋒重好勇敢咁親身上陣，拍完第一個鏡頭之後，唔係好滿意，要求再重拍，點知落番地面，就見佢驚到面青青。問佢係咪好驚，佢即刻點頭，而佢隻手拉住條威吔繩滑落地時，都𠝹親吓，不過霆鋒就死撐話冇事。
圍觀途人又將霆鋒認錯係金城武，可能係霆鋒企得太高，途人見霆鋒落到地下先知認錯人，好彩冇畀霆鋒聽到，唔係就會好尷尬。不過當記者要求成龍同霆鋒影合照時，就真係發生咗尷尬事，事關霆鋒換緊威吔衫時俾成龍叫埋嚟影相，但佢條褲鏈重未拉好，惟有面紅紅咁對住記者拉褲鏈。
跟住再拍一場尹子維個替身踩住單車同成龍吊住威吔喺外牆追到落地下，點知條威吔繩去到十三樓突然鬆咗急降到三樓，成龍即用手將條繩繞幾個圈，及時勒實止住跌勢，實在好驚險。
吳啟華早排喺北京涉嫌召妓，最近有報道話佢嘅監製好友鄧特希，有意開拍電視劇《風月俏佳人》，搵啟華做男主角之餘，重搵咗啟華嘅女友羅泳嫻做佢嘅未婚妻㖭。羅泳嫻噚日同馮仁昭講話其實開套劇係啟華「尋歡」事件之前嘅事，但佢因為太多劇喺手唔知拍唔拍得成，馮仁昭相信啟華拍得成呢套劇的話，收視隨時會爆燈！
蔡依林噚日喺台灣出席網上遊戲《天翼之鍊》宣傳，佢喺台上接受訪問後，突然快步衝落台，令到活動中斷咗五分鐘。後嚟啲記者八卦吓發生啲乜嘢事，原來係蔡依林人有三急，所以大家就幫佢起咗個花名「噓噓公主」。馮仁昭諗蔡依林都忍咗好耐，其實藝人有時真係忙到大小二便都冇時間㗎！
Boy'Z噚日去大潭篤出席慈善花式滑水同樂日，Kenny重好得戚話畀人知佢之前聽商台節目，聽眾投票圈中最似處男嘅男星，佢排行第三位，前面嘅重有古巨基同方力申，問佢點睇？Kenny話：「呢啲係人哋嘅睇法，我講好尷尬喎。」馮仁昭就覺得呢個年代到二十幾歲都重係處男反而唔好，好易會俾人懷疑佢唔得㗎！
