近年專注拓展中環商廈王國嘅置地，今年推出全新住宅樓盤西環綠意居，雖然係單幢樓，但本樓書都落足本錢炮製，單係紙價就已經貴過普通樓書兩成，估計連其他製作成本，相信價錢唔平。
原來啲紙係美國運嚟嘅來路貨，所以特別貴重。據製作呢本樓書嘅廣告公司指出，觸摸呢啲紙時，會感覺到有條紋，佢哋俗稱「有紋紙」，蘭西摸落就覺得，較普通紙較有質感，而置地約印咗四千本樓書，派畀買家。
雖然今次置地賣嘅係住宅，但樓書封面，加插旗下包括置地廣場、交易廣場、遮打大廈、怡和大廈等六幢商廈外貌，內頁重有商廈資料。
香港置地集團住宅物業高級經理黎漢群解釋，因為綠意居設計概念、用料、管理、設施等，都沿自舊有物業，咁嘅安排係想畀人有同出一系之意。
今時今日物業管理都幾蝦人做，有部份業主以為交咗管理費就係老細，遇上不如意事就當管理員係下人一樣咁鬧，有啲更加當佢哋係工人。
蘭西有次去九龍城某個單幢新樓做採訪，一向係登記完就可以自行上樓，點知名管理員話要一齊上樓睇住，話係個單位業主吩咐落。蘭西好奇問，如果一日有十個客嚟睇樓咪要上落十次？點知個管理員話，最多試過一日三十次呀！
其實，盡責嘅管理公司，派員陪同外人睇樓無可厚非，但係次數咁多就唔多妥，管理員就係得幾個，由一個住戶長時間霸佔有限嘅管理資源，在情在理都講唔過去。「打份工啫，有乜辦法。」聽個管理員咁講，蘭西都覺得無奈。
將軍澳蔚藍灣畔前日突擊開售，噚日中原就急不及待公布戰績，助理營業董事譚桂貞話，第一日險勝對手十幾間。嘉里建設，早兩日就宴請中原一班高層，去酒店大擦一餐，慰勞佢哋幫手賣荃灣寶雲滙。
另一邊廂嘅美聯，近排搞咗個員工籃球比賽，以激勵員工奮鬥心咁話，上個禮拜完成初賽，決賽喺二十一號，二十四號總決賽。近排啲大型新盤開始排住隊咁出，班代理又有排忙。
太古同新地合作嘅將軍澳維景灣畔，第三期最後兩座都已經交緊樓，之不過，講咗超過兩年嘅行人天橋直達地鐵站入口，就一直只見一幅牆。聽講地鐵話調景嶺站上蓋發展權交咗畀長實，根據發展進度，要到零六年至完成，而由維景灣畔直入地鐵站嘅通道，必須經過呢個上蓋物業商場，換言之，個入口最快都要三年後先正式開放。
為解決呢段過渡期，太古舊年就自費起咗部𨋢（圖三箭嘴所指），等班業主唔使次次都撐樓梯，最重要係，部𨋢嘅維修同保養由太古負責。
經歷沙士同七一之後，樓市好似漸入佳境，但業界講，雖然唔少租客都覺得，明年寫字樓租金會回升，但又擔心公司生意唔係咁好，所以近排有啲租客傾租約時，將兩年死加一年生嘅租約，要求寫明第三年嘅生約租金不變。到時佢哋既可以選擇續唔續約，個市升都唔受影響。呢啲只對租客有利嘅條款，要業主接受梗係難啦，所以代理大吐苦水，話有排至傾掂。
另外，由於有海景嘅寫字樓單位租金只高冇海景嘅一至兩蚊，加埋有裝修，就特別吸引，聽講𠵱家市場上呢類放盤數手指都數得晒。據聞另一個原因係向北擁海景單位嘅風水好喎，真係信不信由你。
蘭西
電郵地址：
