愛情篇：「我同Vivian感情起伏好大」

訪問當日，倪震向筆者細說與女友周慧敏（Vivian）的生活點滴，他說：「呢兩個禮拜對我同Vivian嘅感情起伏好大，唔係感情有問題，而係我哋三歲嘅貓阿豹，上個月帶佢睇醫生，醫生診斷佢患咗絕症，係貓嘅血癌。

「佢欣賞我才華」
「好彩之後朋友介紹另一個澳洲獸醫畀我哋，再做血液測試，至發覺因為我哋移民返嚟，阿豹要打防疫針，佢對藥物有強烈反應，所以至知之前血液測試搞錯咗。但對我同Vivian嚟講，只要阿豹冇事就得喇！我哋共同度過好多嘢，面對面分享，一齊分擔。」
問倪震可知道一起近十四年的女友喜歡他甚麼？他笑說：「唔使諗，我問過佢，佢講我知，先頭係欣賞我嘅才華，𠵱家就費事搵過個，因為真係好難搵到一個咁啱嘅榫口。至於我？開頭就靚女啦，𠵱家都係一樣，費事再搵啦！我哋未必係天造地設嘅一對，但一齊經歷過好多嘢，要經過好多磨合先做到呢個階段。」

「有人不懷好意」
倪震親口承認的女友有李嘉欣、陳法蓉及周慧敏，但有一段似有卻無的則是與姚樂碧的瓜葛。當年倪震為姚樂碧的寫真集寫序，被說成用文字情挑對方，今日重提舊事，倪震說：「人哋賣感性、賣相，我覺得個序寫得好好，係大家欣賞角度唔同。我寫得出嚟預咗人睇，只係我冇諗過睇嘅人程度咁低，或者不懷好意。」

後記：「我絕對擔當得起才子稱號」
與倪震談及另一才子陶傑，提及陶傑在上月二十六日為本報撰寫的專欄《星期天休息》中，主題為已故蔣介石夫人宋美齡的一篇，倪震大讚陶傑文筆亮麗，他說：「我同爸爸倪匡傾過，佢應該係一筆而就，香港除咗佢，應該冇人寫到咁好嘅文章。」倪震亦被冠稱為才子，問他對此雅號有何看法？他說：「絕對擔當得起，但唔會自稱，因為『才子』喺香港濫用咗。」