倪震重返娛樂圈，再次成為傳媒人，除了主持電台節目外，又辦雜誌，組織反吸煙協會，大展拳腳，似為從政舖路。以名妓比喻自己的倪震坦言希望未來十年能在創作上達到巔峯狀態，有作品流芳百世。
蟄伏六年，三十九歲的倪震回流香港，坦言多了一份愛和包容的他重返耀眼璀璨的娛樂圈，再次成為傳媒人，肩膊上似乎多了一份社會責任感。倪震日前接受本報專訪時說：「我喺加拿大睇住香港一直向下沉，我覺得再唔返嚟會面目全非。我係土生土長嘅香港人，始終香港無論變好啲定差啲，我都要目睹。」
當年寫過一篇《煙俘》細說受二手煙禍害的倪震，正打算在港組織「保護非煙民協會」，他義正詞嚴地說：「我唔係反吸煙，係反室內吸二手煙，我只係想喺食肆同辦公室全面禁煙，唔需要受煙民嘅二手煙毒害。其實我都好憤怒，香港作為一個國際大都市，沉默嘅大多數都冇人肯出嚟為自己爭取權益，所以我想組織一啲聲音，好似去遊行咁，希望爭取到政府立法。」
倪震稍後會辦一本健康雜誌，又組織協會，旗幟如此鮮明，是否有意為自己鋪下政途之路？倪震笑說：「呢幾年唔會考慮，想熟悉番香港社會先，但唔排除呢個可能性。」
重投商台做節目，形式亦是做回老本行，以情做主題，節目《絕情谷》首播更邀得倪震和拍檔張燊悅背後的真命天子周慧敏及雷頌德出山，擔任主持成功博宣傳。節目已播出近一個月，但倪震與拍檔張燊悅的默契有待改善，他說：「事實上同佢張燊悅夾係幾吃力，原來兩個人係好唔同，放喺面前係一個挑戰，大家都好坦承，願意一齊努力克服。」
倪震續說：「當初考慮搵張燊悅，因為佢幾似我後生嗰時，倔強有稜角、有分析力、有自己見解。𠵱家我唔係話佢相反，只能夠講係一個美麗嘅誤會，佢有佢可愛地方。佢從來未做過電台，係處女下海，佢係賣處；我就係名妓登場，係賣功夫，我想技驚四座，所以大家要求會有唔同。」
要做到凡事稱心，的確不容易，坦言正向父親倪匡學習「豁達」這意淺境高道理的倪震，正努力將師傅黃霑向他教誨的「藏混化生修」五個階段融會貫通，化為己有，他說：「呢五個字嘅意思係指吸收唔同資料，再重新學習，去蕪存菁，再以代表自己嘅作品出嚟，盡量將自己能力發揮好啲。一個人創作高峯期係四十至五十歲，我真係想利用呢十年留下一啲嘢落嚟，好似曹雪芹、查良鏞咁有作品流芳百世。」
撰文：馮美茵
攝影：何國豪
