若大家有留意我哋介紹嘅改裝車的話，相信對TWAutosport負責人Tony，應該唔會感到陌生，佢改裝車輛經驗豐富，尤以一眾歐洲車如蓮花及奧迪等為甚；而響今屆澳門格蘭披治大賽車中，TWAutosport更擁有蓮花賽車響Pit站嘅維修管理權，而Tony更成為TeamManager，並為各戰車作賽前安全改裝及作賽時嘅維修㖭！故此今日我哋特別搵嚟Tony，同大家分享吓佢對澳門賽車嘅一啲心得。
記者、攝影：何永仁
擁有12年改裝車輛及維修經驗嘅Tony，最初由一位飛機引擎維修員，搖身一變成為歐洲車改裝專家，並成為第一個改裝商，能直接與代理合作推出改裝車款，甚至喺今屆澳門格蘭披治大賽車中，蓮花Elise戰車嘅TeamManager，所花嘅時間及努力實在不少；佢笑言今次獲澳門格蘭披治大賽車主辦機構嘅賞識，成為一眾蓮花（Lotus）戰車嘅TeamManager，絕對唔係靠運氣，而係靠自己本身嘅經驗及堅持，方能達成呢！
Tony自小對飛機已感興趣，畢業後便跑去投考飛機維修員，佢不但能成為飛機維修員，而且更被編入最具水準嘅飛機引擎維修組別，而當時全港僅有12人符合編入呢個組別嘅資格。「維修飛機引擎除要有專門嘅技術外，最重要係很強責任感，而呢套理念一直影響我日後響改裝汽車上嘅工作態度，故此現時所有嘅改裝零件，我都會經過反覆測試及研究，才會推薦予客人。」Tony說。然而，佢更會到德國及歐洲等地，參加一啲由改裝車廠舉辦嘅講座及課程；另外又曾到意大利修讀賽車場TeamManager課程，學習點樣喺賽車場上管理維修隊伍及參賽車輛㖭！
其實響數年前，Tony已經喺賽車場（如珠海賽車場）為一啲賽車維修及改裝，累積咗唔少經驗，因為呢個緣故，而令佢喺今屆澳門格蘭披治大賽車中，擁有蓮花戰車Pit站嘅維修管理權。「一般嚟講，蓮花Elise喺東望洋賽道作賽，並唔需要有大量嘅特別改裝，相反懸掛組合方面卻要調校得比較小心，因賽道係由街道所組成，懸掛設定不能太軟或太硬，配合車手出色嘅技術，方可完成賽事。」另外，佢又認為多數車手響賽事中犯錯，係因為心急造成，加上賽道狹窄，好易因為遲咗煞車而發生意外。
Tony不但成為今次賽事嘅TeamManager，而且重有三位車手請佢代為改裝參賽用嘅車輛；「響今次改裝嘅車輛中，其中黃色一部用咗十多萬元嘅改裝費用，令馬力輸出增至150匹，並喺珠海賽車場曾造出2分01秒嘅極快圈速；同時又因為已加有不同嘅保護引擎設備，響三日嘅TrackDay中，引擎無出現毛病或機件過熱嘅情況，相信響今次嘅賽事中問鼎三甲位置，絕對唔係一件難事。」
另外，Tony又表示響今次嘅賽事中，消耗最多嘅用品將會係機油及輪胎等等，而後備嘅波箱及引擎零件，都係重要項目之一；而佢擁有嘅一台專用電腦，可於賽車場中即場檢查出戰車嘅毛病，以便即時作出維修，以求令各戰車可以最佳狀態參賽呢！
Tony話由於蓮花Elise本身已用上大量賽車化設計，故此喺落場前已毋須作出大量改裝，但必須加裝大會指定嘅賽車安全用品，方可正式落場出賽，缺一不可；而有關物品，則如下表所列。
1.合乎賽車規格嘅防滾架
2.車外死火掣
3.車內死火掣
4.賽車用嘅泡沫滅火筒
5.賽車專用輪胎
6.三吋闊嘅四點式安全帶
