第十屆MTV歐洲音樂頒獎禮終於曲終人散，今年JustinTimberlake獨攬三獎，成為大贏家，而據知一直冇露面嘅金美侖戴雅絲（CameronDiaz）就喺慶功宴會場嘅VIP區睇住佢，佢哋重話會去蘇格蘭著名嘅Highlands度假㖭，不過被問到結婚嘅傳聞，Justin就一味大笑，重話佢唔準備同任何人結婚。
雖然Justin喺頒獎禮威晒，但係論出位，點都唔夠ChristinaAguilera，佢全晚換咗十三套衫，睇到觀眾眼都花，而且當晚嘅表演頗受好評，兼且又攞埋個最佳女歌手，認真攞晒彩。
不過，Christina同死對頭Pink嘅仇恨，就差啲連累到個頒獎禮。事緣Pink事前同節目監製話如果由Christina呢個「賤貨」介紹佢出場，佢就唔出場，搞到大會好頭痕，結果最後由一把男聲介紹Pink出場，而頒獎禮完咗後，Christina喺約一點鐘去到BMG個派對時，Pink就即刻話頂唔順，十幾分鐘之後就離開咗，佢兩個都真係玩串晒成個party。
唔知係咪高興得滯，當晚派對上個個歌手都係咁狂飲，結果搞到會所嘅香檳嚴重缺貨，全晚總共飲咗價值約六百五十萬港元名酒，搞到班星第二日離開愛丁堡時都好似未瞓醒咁。