國學大師饒宗頤將一批逾二萬冊嘅珍貴書畫藏品，一口氣捐咗畀港大，港大亦非常畀面饒老，由林伯欣基金捐錢成立「饒宗頤學術館」，收藏呢批珍品，而呢個以饒老為名嘅學術中心重會開放畀學者作為研究用途。
噚日港大特別搞咗個開幕禮，除咗饒老外，重有民政事務局局長何志平、港大校長徐立之，一班富豪好似林伯欣、李嘉誠等做主禮嘉賓，港大重用饒老畫嘅一幅觀音像造成刺繡，送畀台上嘉賓留念。
饒老噚日致辭時好開心咁話，中國𠵱家正走入新文藝復興年代，香港可以扮演「中國威尼斯」嘅角色，成為文化中心，佢話呢個目標要靠在場多位「威尼斯商人」支持先做得到。八方知道歐洲文藝復興年代，威尼斯商人出錢出力推動文化藝術事業，所以饒老以此為喻。
之不過，饒老嘅話又令八方諗起莎士比亞筆下著名嘅《威尼斯商人》，饒老可能想誠哥、林伯效法呢位威尼斯商人咁慷慨，不過饒老一定唔會想誠哥搞到要畀債主迫佢割一磅肉還債啦！重有，饒老將香港比作威尼斯，但係威尼斯最後都以沒落告終，被其他歐洲城市取代地位，睇返家下由老董管治下的香港，再諗饒老比喻，都咪話唔牙煙！
傳真︰2623-9278
電郵︰