賽車又點少得賽車女郎，噚日雖然係金禧大賽車首日賽事，但已經俾小記發現一對靚嘅孖生RacingGirl。呢對twins今年只得二十二歲，家姐徐歡，細妹徐迎，吉林人。原來兩位都係香港車手馬清揚嘅御用Model，兩人除樣靚身材正外，最勁係兩位是西南政法大學法律系學生，模特兒只係兼職。
澳門金禧大賽車首日只舉行排位賽，未到戲肉，碰啱成日天陰有雨，入場觀眾只得一成左右，場面氣氛麻麻哋；不過大會相當識做，在排位賽空檔的時間，就安排旅遊大使嘅卡通人物喺維修站附近搞吓氣氛。
呢個世界好公道，有好自然有壞，有靚當然亦有醜，好似幾位由浴室按摩女扮嘅賽車女郎，同twins成強烈對比，就算佢哋用幾厚嘅粉底化妝，𠵱然遮唔到佢哋嘅殘樣。正所謂將勤補拙，為增加收視，惟有賣弄性感博出位，呢個方法喺賽車場真係萬試萬靈。
今年五十屆澳門大賽車，第一日比賽新增幾個項目，得最受車迷歡迎嘅，莫過於由不同車種組合參戰嘅路車賽事。試想吓我哋平時喺街上見慣見熟嘅「露筍」、「掃把佬」、「波子」及「寶馬」同場競技，親切感點都大過方程式賽車；加上各車種馬力與性能不同，鬥起上嚟份外精采兼過癮。
