有時真係唔好睇小啲女人，尤其係啲靚嘅女人，好似早排啱啱個富商男友先話唔掂嘅排骨女星，少咗條大水喉之後，好快又喺上海識咗個新富商男友。
呢個新水喉四十幾歲，喺東北去上海發展，呢幾年撈得幾掂，幾個月前喺朋友介紹下識咗排骨女星，排骨女星𠵱家每個禮拜只要得閒都會去上海一、兩日應酬吓個老闆。
其實排骨女星係幾「進取」，佢試過三次主動搵人搭路，想做香港富豪女友，不過俾人嫌佢cheap冇睬佢。有人覺佢cheap，但亦有一位靚仔紅星當佢係寶，幾年前排骨女星搭上內地富豪飛咗靚仔紅星，難得靚仔紅星不計前嫌同佢復合，唔知今次佢哋可以好得幾耐呢？
混血女模AnaR.噚日去沙田參加一個護膚品活動，佢一身短裙打扮，條皮帶重有佢男友周立璟（Brian）個名，AnaR.話：「係一個朋友自製送畀我嘅禮物，日日用呢條皮帶，就好似同男友一齊咁，心情都好啲㗎。」唔知佢點可以日日都用呢條皮帶襯唔同嘅衫呢，可能名模係唔同啲啩！
李心潔同埋趙傳、張洪量、五月天嚟緊會演出「情感萬花筒演唱會」，佢哋噚日去咗元朗一間安老院探訪，李心潔左手中指戴咗隻戒指，話係導演男友彭順所送，佢話冇乜特別意思，只係因為自己鍾意，所以男友就送，重話女友係愛嚟錫嘅，睇怕佢都冧到矇查查，唔記得左手中指係戴訂婚戒指㗎喇。
胡杏兒噚日喺奧海城出席義賣活動，對於有指佢近日恃寵生驕，拍電視劇《彩虹橋》時嗲監製博加戲份，杏兒就否認呢個傳聞，重話雜誌要咁寫點回應都冇用，費事愈描愈黑，自己行得正企得正，咪當佢哋幫套劇做宣傳喎！雖然當事人就例牌否認，但近期的而且確多咗呢啲是非針對杏兒，正所謂空穴來風未必無因，睇嚟杏兒都係留意吓自己啲言行好啲！
薛家燕噚日着條迷你裙去奧海城出席活動，問佢點解着得咁風騷？佢話啱啱喺新加坡返嚟，當地啲影迷大讚佢好似三十七年前咁靚，所以佢想保持住呢份風采喎。咁有冇吸引啲狂蜂浪蝶飛過嚟？家燕姐笑住話近日有個細佢六年嘅男士出現，大家都幾投契，不過佢自己就幾抗拒姊弟戀，要考慮吓。家燕姐𠵱家乜嘢年代呀，重咁保守？
台灣歌手林子良來港宣傳，噚日工作後乘坐保母車返回公司期間在東區走廊遇上小車禍，保母車車尾被一架私家車撞到，好在冇人受傷，林子良即時嚇一跳，今次真係算好彩，第一次嚟香港就有如此深刻印象，而佢嘅唱片公司為咗令佢定驚，就話會請林子良去鋸扒食餐好，呢位新人真係易滿足。
Boy'Z同Isabella噚日應邀出席「2003地鐵安全月揭幕儀式」，Boy'Z重即場同大家分享坐地鐵嘅經驗，佢哋話自己入咗娛樂圈之後，都重係照樣坐地鐵，佢哋話：「有次見到個男仔撞向玻璃幕門跌喺地上，當時唔知笑定唔笑，但最終我哋都有扶起佢。」身為偶像，分享埋晒呢啲黑心經驗好似唔係咁好喎！
