呢兩星期Marvel英雄大晒，上禮拜先有《TheHulk》，本周再嚟《變種特攻2》，槍戰、武打、爆炸場面、科幻特技，全部都係最強「炸機」格局，銀幕比例重要係最啱Plasma嘅2.35:1超闊屏，加全場132分鐘玩盡5.1聲道dts，不論視覺聽覺都係最高享受，而且亦係對你套影音組合最高考驗！
記者、攝影：朱崇德
美國漫畫英雄會——X-MAN，今次已經第二集，一樣玩大堆頭；登場超級英雄主要都有12個，齋排場已經叫一眾漫畫迷興奮不已；故事主線落在狼人、Mr.X同磁力王身上，不過就多咗個「人類」大奸角，電影內這位S將軍大玩人類及變形人間挑撥離間，最後激得變種人主戰及反戰兩派合力圍剿；故事好似有心影射種族間的仇恨，可是引發戰事的禍根！
論今集最搶眼新登場人物，都算係一開場刺殺美國總統的黑丑！佢一邊用空間轉移忽然出現，忽然又幻化虛無，所謂邊打邊遊走，逐步撕破白宮最嚴密保安網，呢段武打場面可謂最別開生面！至於全劇高潮，就當然係狼人大戰爪后一幕啦！一方面狼人終於尋訪出佢身世之謎，另方面又要面對同自己一樣，有打不死鋼鐵身軀的爪后對決！絕對肉搏加鬥智鬥力！
聲畫表現，全套戲都是以陰沉的黑調子拍攝，睇落好Moody；DVD銀幕比例用上非常貼近戲院銀幕嘅2.35:1超闊屏，如能配合Plasma睇，真係有如置身大戲院中！聲效亦是強銷賣點，基本全套劇132分鐘，唔超過5至6分鐘就有一場不論大、中、小的打鬥，你會發覺你對耳仔由開場到完場，都不停招呼住嗰5.1環迴立體聲效果，可算近期3區碟中幾好「炸」嘅一隻！
呢個Making會用四個角度分鏡，解構黑丑開場一幕時如何拍成，由電腦模擬、拍菲林毛片、加入電腦特技，到最後總一Tune色，你會明白拍呢幕難度有幾高。
發行：得利影視
區碼：3區
價錢：（特別版）約$155
（普通版）約$145
《我的野蠻女友》導演郭在容，最新觸動深情之作《假如愛有天意》，今個星期都出咗DVD，感覺好似唔係太多人知，事關行旺角DVD舖，只見一啲大型連鎖店先入貨，細舖就唔多見備貨。
故事講述女主角（韓國新一代玉女掌門人）孫藝珍飾的梓希，和大學好友秀景雙雙暗戀學長尚民，外向的秀景於是要求梓希代寫情信給尚民，一封又一封的情信，寫的是梓希的心情，下款卻是他人的名字。一天，梓希收拾房間發現一個神秘箱子，滿載着母親的初戀回憶，發覺母親的初戀故事跟她的遭遇竟巧妙地相似……。
論故事橋段，真係有幾分似早年梁詠琪的《心動》，不過畫面就走唯美主義嘅靚人靚景，韓國超級靚女孫藝珍同飾梓希母、女兩角，清純可愛，演技亦見大將之風，絕對係韓片發燒友，冇理由唔睇嘅好戲！不過筆者在此奉勸各位，呢套戲可謂對你哋淚線嚴峻考驗之作，睇前買定紙巾會方便啲！
原劇中，梓希原有一幕被4個流氓調戲，但她學過跆拳道武功底，以一敵4，拳拳打要害！好有當年《我的野蠻女友》Feel。
發行：安樂影視
區碼：3區
價錢：約$118
