太空人楊利偉訪港訪澳成功，已經班師回朝，特區政府有排偷師。今次個騷咁順利，除咗偉哥訓練有素，康文署、民政總署、新聞處、警方同科學館一眾人等都值得讚。
八方成日話何志平好命，下面有班以李麗娟為首嘅女將，聽講今次人人都做得好開心。至於太空館，科學館總館長葉賜權就更high，太空館首次二十四小時開放，佢就差不多日日企喺度，變咗神五專家。
八方問媽打對太空人有乜印象，佢話所有接待過代表團嘅人都豎起手指公，而媽打都有幫佢最緊張嘅一班沙士孤雛攞大球場飛。
估唔到鋼琴王子李雲迪都係太空人fans，於是安排兩人相會，重由王倩儀署長親自陪佢去睇太空展。咁李雲迪都有好多擁躉，大家唔蝕底，爭住同中國木村影相留念。
馬會夏佳理主席出手亦極爽快，捐咗五百萬畀航空展，有十萬人受惠，都要讚吓。
傳真︰2623-9278
電郵︰