今季民族潮流大熱，眼見大人穿上紮染衣服，配上一身民族飾物，的確有型，小朋友又怎可錯過這股潮流呢！今次一班小蘋果會員就追趕民族熱，齊齊去學雲南傳統的紮染和豆粉染，短短一小時，已學有所成，睇吓佢哋學得幾開心！
記者：妹頭 攝影：文尼哥哥
鳴謝：香港民族文化促進交流會（93311157）、滇園（24083138）
民族飾物都有很多種類，今次一班小朋友便跟來自雲南彝族的李小姐學正宗的紮染及豆粉染工藝。未炮製前，導師當然要向各位小會員介紹紮染這款特色工藝。原來紮染在古代稱為絞纈，做法簡單，只要用針線沿白色的布隨自己的心意上紮、綑綁等，然後再放入顏料內浸染，乾透便成。由於被綑紮的部份無染料浸入，所以該部份便呈白色，形成大大小小的圖案。聽導師講，紮染最考心思和最花時間，染一塊大布，往往要花上一個月時間才能完成，而各位小朋友當然以細細塊的布為試金石，一於睇睇他們染成甚麼樣子？
既然導師講完古仔，小朋友當然想即刻試試。導師教大家用綑紮這種紮染的方法製造，由於手仔要靈活，導師特別安排年紀較大的小朋友做。材料有五穀豆豆、線、棉布、顏料，夠晒天然，究竟製法如何？一於去片睇睇。
步驟
小朋友試做完畢，當然要問吓佢哋邊個步驟最難做，於是就搵咗全場做得最靚嘅恒仔問一問，他說：「最難係紮豆豆，因為豆豆好細粒，包時要好出力呀！」
講求手仔靈活的綑紮染，適合年紀較長的小朋友玩，年紀較輕的則可以學玩豆粉染。做法十分簡單，只要將預先𠝹了圖案的膠片放在布上，然後塗上用雲南特製的豌豆粉和顏料混合而成的染料，最後要用熱水滾一滾，再風乾便完成，的確快、靚、正。
