若選舉中環最冇人氣嘅大廈，遮打道九號遮打大廈（ChaterHouse）肯定入選。前身太古大廈，雖然舊啲，但大廈內行人多，舖頭商店夠親切，兼且有一間美心集團嘅GiGi㗎啡室（當年左丁山經常在GiGi飲下午茶，本欄即以此為名），係高級蛇竇，每日中午下午甚為熱鬧。
𠵱家呢？地下大堂冷冰冰，一樓二樓全為Armani店舖，左丁山幾時經過，都唔見有甚麼人客，成間大廈外貌嘅設計、氣氛，英文所謂decorambience都似拒人於千里之外，故此中環人都視遮打大廈為行人通道，方便我哋由置地廣場行過去交易廣場而已，怱怱而過，冇人願意留低。
總監L嘅公司最近搬咗去遮打道九號，返工幾個星期，佢已經覺得氣氛好唔舒服。有人教訓佢：「唔好咁無文化，呢啲係後現代設計，香港人要學習吓至得。」總監L頂唔順，自認敝鄉，回答話：「我係一個庸俗冇文化只講直覺嘅普通香港行政人員，唔知道乜嘢叫做後現代，譬如今日《蘋果日報》刊登一幅法國藝術家德拉克洛瓦嘅瑪麗安名畫──《自由領導人民》，夠晒激情，呢間大廈可以掛示呢類名畫複製品，等我哋振奮精神吖！」對方無言以對。後來左丁山聽到業主置地公司都想話選一啲畫嚟掛吓，但選畫無法下決定，都唔知選到幾時。照計遮打大廈已經租滿，而且租金有貴有平，摩根大通係最大最貴租嘅租戶，佢哋應該代表租戶出句聲吖。