個市呢排認真古怪，無厘頭咁喺上禮拜四跟日本市急跌近300點，好彩啲股仔無乜事。上周五公布會以7個仙發行3.7億股一年期公司輪嘅意科控股（943），聽講已經有班大戶籌備銀両準備圍飛，點解佢哋咁博去炒輪？原來係隻嘢稍後會有動作，按傳統智慧，公司發咗批輪出去，收番成2千幾萬，梗係有啲動作。
意科上周五停牌並公布發行3億7輪出街後，玩開公司輪嘅行家話呢次隻股有得炒。以2毫8行使價計，再加埋隻輪嘅發行價7仙，即係話班認咗隻論嘅大戶要用3毫半嚟認購一股，貴過𠵱家市價一成幾，佢哋無理由咁笨做蝕本生意，所以隻股起碼要升過呢個水平，大家不妨留意一下。
另外，伏勝早前提過有DIY概念、專門生產電動工具嘅旺城國際（2389），喺上星期狂升咗一輪之後，已經由原來起步點1.1元升至上個禮拜五收市價1.77元，升足6成。朋友來料，話隻股升勢重未完，皆因有大戶話𠵱家興DIY，例如買完傢俬要自己安裝，變相對電動工具嘅需求大增，佢哋諗住食住呢條水去開拓未被開發嘅市場。另外，美國加州山林大火最終被撲滅，不過就有好多房屋被火燒毀，要重建嘅話，對電動工具嘅需求就更加大，所以班大戶就用呢個理由，將隻股踢高。據個朋友講，今次班大戶好可能將隻股踢上2蚊，然後再向其他「芬佬」推介。不過師傅教落，隻股嘅累積升幅都幾犀利，要上車真係要帶多幾支白花油。
伏勝