巨星匯唔單止搞到一鑊泡，重連中環嘅行政管理人員都成為直接受害人。巨星匯所在地添馬艦，本來由安泊停車場成功投標，攞嚟做露天停車場，時租五蚊，喺中環咁高尚嘅地區，收上水嘅價錢，自然深受中環揸車一族歡迎。
有啲鬼佬住大嶼山，計過條數，日日揸車去中環返工，架車泊喺添馬艦安泊停車場，泊足一日，重平過坐機鐵，所以停車場生意鬼咁旺，連喺銅鑼灣、上環嗰頭返工嘅居民，都揸嚟添馬艦泊車寧願接駁的士，所以又帶挈的士佬搵兩餐。
由於安泊嘅雪中送炭價，迫使會展中心停車場亦減價，時租十蚊。政府趕走咗安泊，除咗的士佬撈少浸，會展中心即時起價到時租二十三元，上班一族當堂媽媽聲。
今次添馬艦用嚟做騷，勞民傷財不特止，又趕絕多一個迎合市民利益嘅平價停車場，加倍擾民，阿董手下成班官僚，自己浪費，阻撓市民慳錢，咁嘅政府，幾時至學識生性？
傳真︰2623-9278
電郵︰