經紀陳啱啱講完科建控股（563）就快有搞作，點知話口未完，噚日科建就公布入股鳳凰衛視（8002）喺深圳嘅地產項目。小初睇完當堂打個突，覺得有啲無厘頭，市場反應亦係麻麻地，科建股價先升後勁回。
科建噚日最高見過0.60元，收0.475元，倒跌10.38%，成交金額重有成1502萬元。
雖然科建股價表現咁肉酸，但經紀陳仍然死撐，話稍後公司會有其他項目注入，唔止淨係呢單大陸地產項目。小初心諗，即管放長雙眼睇吓點。
另外，傳聞配股多時嘅利民實業（229），終於在噚日停牌，落實搞配股。但奇就奇在配股價係2.50元，較停牌前收市價2.475元，有輕微溢價。
經紀黃話，唔知係咪因為批股數量唔大，所以就算有溢價，據講反應都唔錯，出現單位數字的超額認購。
小初對利民批股反應咁好，確係有多少意外，皆因近期芬佬淨係留意紅籌國企股，估唔到本地工業股會繼續受芬佬青睞。
如果經紀黃冇收錯料，利民復牌股價應該唔會差。
慕容小初