新車速報：好玩又跑得<br>愛快1562.0JTSTISelespeed

新車速報：好玩又跑得
愛快1562.0JTSTISelespeed

車迷期待已久嘅Facelifted新版愛快156，終於正式登場，新車除多方面有改動之餘，代理更特別引進加有全車包圍嘅TI特別版抵港，而一台2.0JTS引擎及5前速Selespeed半自動波箱嘅配搭，亦令新車有出色嘅性能表現。有興趣嘅車迷，不如𠵱家一齊嚟睇吓喇！

記者、攝影：何永仁
新車售價：$318,000
車輛提供：嘉輪汽車（28778788）

愛快156，一直憑住獨特嘅造型及出眾性能表現，而備受車迷追捧，並成為澳門格蘭披治大賽車嘅救援車輛㖭！而響早前，廠方就為其推出Facelifted新版，不但外形略有改動，車廂及機械配搭亦有改進。然而，今回代理更引入埋加有全車包圍嘅新版156抵港，定能惹來不少車迷垂青呢！

加包圍型到盡
屬Facelifted新版嘅愛快1562.0JTSTISelespeed，不但響外形上略有改動，抵港嘅新車更備有全車包圍，同埋17吋跑車合金胎軨組合，望落份外惹人注目，好有一份拉丁房跑車嘅風味；一組Xenon頭燈照明度十足，可有助增強晚間行車安全性，而闊大跑車尾喉組合，亦可讓你感受到引擎雄渾嘅咆哮聲之餘，亦能令引擎呼吸變得更暢順㖭！

■一套5前速Selespeed半自動波，無論自動或手動模式，皆可令引擎發揮至極。

■前排一雙真皮跑車桶椅不但承托力高，另備有伸縮腿墊組合。

車廂布局顯個性
打開車門所見，呢部全新愛快1562.0JTSTISelespeed，除車廂空間來得寬敞闊落外，廠方更特別為其加裝有承托力甚豐，輔以伸縮腿墊嘅Momo高級真皮跑車桶椅、原廠恒溫冷氣、BOSE高級音響組合、車門電窗同埋電天窗等組合，享受可謂愜意至極；三幅式真皮跑車軚環及波棍的，亦能予人十足把持感。另外，車內又備有前座雙安全氣袋、側氣袋連充氣簾幕，以保障車上乘客安全㗎！

■後排空間闊落，匹配中央手枕組合，乘坐倍見愜意。

■中控台有齊原廠音響及恒溫冷氣外，頂端更設有行車電腦顯示屏幕。

引擎扭力輸出強
新車係以一台2.0公升JTS偈作核心，不但馬力輸出充裕，當引擎處於3250rpm時，經已發揮出高達21.0kgm嘅峯值扭力，匹配一套5前速Selespeed半自波箱，無論選用自動或手動模式，皆能讓引擎發揮至極。然而，四輪高效能碟式制動，輔以跑車迫力皮及ABS、EBD等電子系統，亦可予人收放自如之感；當然唔少得重有一套經過強化嘅跑車懸掛組合，同埋215/45R17高性能輪胎配搭，所為你帶來嘅出眾操控表現啦！

■三幅式跑車軚環除有各設備嘅控制鍵之餘，另設有+/-半自動波按鍵。

■鑲有銀白框邊嘅雙圓表板配搭，資料豐富又易讀。

■簡潔嘅車廂布局，顯現出一派拉丁房跑車風味。

記者評語：全新包裝個性盡現
今回抵港嘅Facelifted新版愛快156，不但賣相要來得突出，代理更為其加裝有全車包圍及17吋跑車合金胎軨，望落更見跑味十足；而車廂配搭又見豪邁富跑味，一套經過強化嘅跑車懸掛組合，更令車子有出眾嘅操控性呢！

■全新車頭氣霸及鬼面罩配搭，望落份外吸引突出。

■改換跑車懸掛及17吋跑車胎軨組合，循迹性更強。

■闊大跑車尾喉組合，能有助引擎呼吸變得暢順。

愛快1562.0JTSTISelespeed規格
引擎：1970cc直4DOHC
馬力：165ps/6400rpm
扭力：21.0kgm/3250rpm
傳動：5前速Selespeed半自動波
懸掛：（前）雙搖臂（後）麥花臣支柱
制動：（前）透氣碟（後）碟式（ABS）
輪胎：215/45R17
尺碼：4430×1745×1415mm
軸距：2595mm；車重：1285kg
0-100公里：8.2秒；極速：220km/h
平均耗油：8.6L/100km

■一台2.0公升直4JTS引擎低轉扭力輸出充裕，可令車子有更佳性能表現。