圈中唔少情侶喺人前鬼咁恩愛，但冇人睇到就未必係呢一回事。馮仁昭有個朋友好鍾意去蒲的士高，佢早排就喺中環撞到靚女紅星嘅大隻佬男友「偷食」喇！
靚女紅星自從公開咗同大隻佬拍拖之後，佢好多時出席公開場合都有影皆雙，而且靚女紅星重話唔介意同男友拍檔演出，兩個嘅關係非常高調。之不過講就一套，實情可能係另一回事。
馮仁昭個朋友日前喺中環一間的士高，就見到大隻佬男友背住自己女朋友走去蒲，佢當時重攬住一名打扮性感嘅妙齡女子喺個舞池跳舞，兩個人好鬼親密，如果唔識佢哋，就真係以為係一對熱戀情侶㖭。大隻佬男友同妙齡女子不時又攬又錫，唔知如果靚女紅星睇到，佢對眼會唔會睜到「爆」呢？
由韓國影帝宋康昊主演嘅電影《殺人的回憶》，噚日俾韓國電影評論家協會選為最佳電影，宋康昊再攞最佳男主角，打敗咗《緋聞——朝鮮男女相悅之詞》嘅裴勇俊，好彩《緋》片嘅李美淑得到女主角獎攞番個彩。《殺》片重獲邀以競賽電影嘅身份，參加意大利嘅都靈國際電影節㖭。
繼《無間道II》同《大隻佬》兩部港片收過二千萬後，呢輪啲港片票房又弱咗，好似古天樂擔正嘅《豪情》，至前日上咗八日都係收四百幾萬，走勢同奇洛李維斯套《22世紀殺人網絡3驚變世紀》就好大距離。其實《豪情》上III級係會少咗班後生仔觀眾，如果多一個IIB版本可能會好啲。
周麗淇日前獲一個商場頒贈「最具品味生活獎」，令佢好開心，因為可以同張天愛同埋琦琦一齊攞獎，對於生活品味佢自問都有啲研究，平時佢做完嘢都會即刻返屋企坐低飲吓嘢休息吓。不過馮仁昭覺得有冇生活品味唔係單憑一兩件擺設，而係要睇個人有冇呢方面嘅氣質嘅！
馬浚偉日前獲委任為東區滅罪大使，參加咗東區警區及東區少年警訊合辦嘅「唱走罪惡滅罪歌唱比賽」，馬浚偉話好榮幸，重好興奮話：「大會頒咗一支香港警隊舊式警棍畀我，棍上面重有『花雞繩』，呢樣係頒畀英勇同有突出表現嘅警員㗎！」馬浚偉收到支棍都咁High，唔知佢細細個嘅志願係咪做警察呢？
王力宏應「麥當勞兒童慈善基金會」的邀請做榮譽義工，佢話自己喺美國讀大學已經有做義工，帶啲病童去超巿買餸，重教佢哋煮意大利粉同沙律。王力宏話自己好早就體會到做義工嘅驕傲，希望幫到多啲人。原來王力宏咁鍾意幫人，唔怪之得佢早前都做「義工」帶少女去睇婦科醫生啦！
噚日姚嘉妮聯同一班名模好似Rosemary同周汶錡等去灣仔會展行婚紗show，工多藝熟嘅佢話行得婚紗show多，身邊啲朋友咁啱個個輪住嚟結婚，重爭住問佢攞着婚紗嘅意見㖭，佢講笑話自己大有條件做婚紗顧問，但係問到幾時輪到佢同男友林祖輝拉埋天窗，佢就話：「我哋𠵱家幾好吖，暫時都冇計劃結婚。」
