是日龍頭窩輪，係Q仔公司輪609，升36%。正股（243）由2.875元升上3.05元，背景新聞係美國晶片股好世界，品質前景有得睇。不過609行使價6.14元，隻輪重有兩個月多啲夠鐘，估吓Q仔有冇可能喺呢段時間內，由3元邊緣踢高1個「開」上到6元以上？買609最後有冇得剩好易計也。
華能國電（902）微跌20仙，收11.60元，跌幅1.7%，隻Call輪9196散10仙，跌幅17%，收48仙。呢隻輪出世唔夠1個月，市場散戶相信揸得非常有限。揸呢隻輪幾個月後若然有錢賺（揸幾日就難講，因為貨源供求易左右輪價），揸正股者就賺到笑唔埋口，點解？因為隻輪行使價係16元，正股做緊11.60元，要正股由𠵱家升上16元以上，升幅38%，隻輪先至有得剩，唔使用嚟做廢紙。又唔係長壽得好勁，明年4月底到期。炒輪冇錯要睇槓桿率，9196槓桿率24.2倍，好爆炸，不過溢價42%又太高。
冠軍（092）有些少郁，收1.76元，進帳3仙，公司輪1134升3.6%，收57仙。隻輪明年1月中前夠鐘，行使價1.16元，負溢價1.6%，槓桿率3.1倍。揸呢隻，要發大財唔容易，到底槓桿率唔夠大，不過有負溢價，而正股又偏低有機會升，揸1134要賺2成有希望（只要正股升6--7%）。
章 盛