點樣教女，成為老友嘅關切問題。上星期聽《自由風自由Phone》，一位聽眾窒主持人陳耀華、陳國康：「啲聽眾咁樣鬧林貝聿嘉，香港冇希望咯，你哋港台人員貪污案又點呀，又唔交代，教我點樣教仔女？」主持人雙陳係純情小生，唔識答，呢位聽眾打橫嚟講，人哋講王見秋，佢就講番陳年舊事（已經在法庭審結，判咗案）嚟挖，分明係轉移視線，如果我係陳耀華，就會答：「教仔女最緊要明辨是非，懂得邏輯思維，唔好抱殘守缺。」
聽林貝聿嘉、鄔維庸、王見秋之言，亦係教仔女教材，不可忽略。呢日中貿林喺食飯時講：「假如有男人要送一層豪宅畀你個女，你會教佢點辦？」大家𢱑𢱑頭，律師陳話：「嗱，三百萬就唔要，三千萬一層就我要！」眾人笑到冇聲出。笑完之後，經紀K講：「要問清楚呀，送樓畀我個女，有何目的。如果彼此情投意合，互訂終身，咁咪收咗份厚禮囉！」咁大份禮物，唔收，得唔得？大家一致同意，今時今日，拒絕厚禮，難度甚高，非極清高之人莫辦！一位見習女律師竟為一張地鐵車票而毀壞前途，你都知道人心如何啦。
會計L係中學校監，佢話：「睇專欄知道大工業家田家炳識習朱子治家格言，於是我翻查通勝，亦學番一兩句，嗱，嫁女擇佳婿，毋索重聘，娶媳求淑女，勿計厚奩，見富貴而生諂空者，最可恥，遇貧窮而作驕態者，賤莫甚。大家識唔識呀！」