劉青雲和爾冬陞前晚在尖沙嘴出席電影《忘不了》座談會，談到張栢芝在戲中的表現讚不絕口。
青雲在多年前曾跟袁詠儀（靚靚）合作主演電影《新不了情》，問到他可擔心觀眾會將《新》片和《忘》片作比較，青雲說：「好難講邊部好啲，栢芝同靚靚演唔同角色、時代都唔同，而且《新》片同𠵱家都相隔咗八、九年，我都改變咗好多，我覺得同栢芝合作，大家都有火花。」
問到青雲可擔心栢芝的負面新聞影響票房，他說：「佢（張栢芝）有佢嘅新聞價值，呢行始終要成日見報。」近日無綫有意再開拍電視劇《新紮師兄》，青雲自言不能再演「弗佬」一角，但他意屬由古天樂來演。
此外，爾冬陞稱讚栢芝在《忘》片中演出，他說：「戲中栢芝演番自己，佢演技好好，喺呢輩演員中好出眾，佢好有天份，未來幾年相信佢可以有發揮空間。」
採訪、攝影：馮美茵